Babio guraso elkarteak aurkeztutako mozioak aho batez onartu zituzten ostegunean Okondo eta Amurrioko udal osoko bilkurek.
Okondo Aurrerak, EH Bilduk eta EAJk alde bozkatu zuten Okondon eta Amurrion gauza bera egin zuten PSE-EEk, EH Bilduk, EAJk, Orain Amurriok eta Guk Baik.
Testuak Eusko Jaurlaritzako Garraio Sailari eskatzen dio bitartekoak jartzeko batxiler eta lanbide heziketako ikasleentzat, klasera joan daitezen.
Ikasle gehienak, garraiatuak
Gurasoek azaldu dute Zaraobe Instituak 636 ikasle dituela eta gehienak garraiatuak direla. Horietako 15 inguru zailtasunak dituzte ikastetxera joateko, garraio publiko egokirik ez baitago haien herrietan -Lezama, Lanteno, Inoso, Beotegi, Soxo, Izoria, Larrinbe, Erretes Tudela, Erretes Lanteno, besteak beste-. Horren ondorioz senideen autoak edo taxia erabiliz joan behar dute Zaraobe Institutura.
Hori konpontzeko gurasoek eskatzen diote Eusko Jaurlaritzari edo bitarteko gehiago jartzea edo diru-laguntzak bermatzea taxia erabiltzen dutenentzat.
Derrigorrezko bigarren hezkuntzako ikasleak garraiatzen dituzten ibilgailuek batxilergoko ikasle horiek ere jasotzea da gurasoek proposatutako beste konponbide bat.