Errotatiban dago jada, udako oporretatik bueltan, Aiaraldea Egunkariaren ikasturteko lehen zenbakia. Bihar egongo da eskura eta ohiko formatua mantenduko du: 16 orri, euskarazko 40 gramoko dosia.
Eduki anitzak izango ditu ikasturteko lehen zenbaki horrek. Herriz herrikako atalean eskualdeko udalerrietako kurtso hasierako albisteek hartuko dute protagonismoa. Sozioekonomia atalak, berriz, berriki epaitu eta absolbitu dituzten Tubos Reunidoseko bi langileen kasua izango du aztergai.
Jendartearen atalak ere gaurkotasun handiko gai bati helduko dio: errefuxiatuenari. Laudioko, Amurrioko eta Urduñako udalek problematika horri emango dioten erantzuna izango du hizpide, eta Bosniako gerra dela eta Aiaraldera etorri ziren familien esperientzia ekarriko du gogora.
Erreportajeak, berriz, oso bestelako gai bat izango du hizpide: "Reality show"-etan parte hartu duten aiaraldearrak. Horietako batzuen esperientziak jasoko ditu testuak.
Fita Fik Euskal Soinu-tresnen Eskola izango da Kultura atalaren protagonista, baina lekua izango dute baita Aiala Mendieta abeslariari eginiko elkarrizketak eta Luis Vilen lehen filma luzeak. Kirolean berdin: Aaron Garmendia Raid-en inguruan mintzatuko da, baina beste hainbat gai ere egongo dira: irristaketa edota spring rally-a, esate baterako.
Bukatzeko, Alvaro Molero De Liches-ek bere otsoa aurkeztuko du kontra-azalean.
Iritzi-zutabeak
Ohikoan bezala, egunkariaren marjinetan iritzi-zutabeak topatu ahal izango ditu irakurleak. Kurtsoko lehen ale honetan Andoni Aldekoa, Agapito Valle, Jonatan Moreno, Patxi Iturregi, Jon Muñoz eta Irati Marañon arduratu dira horiek idazteaz. Komikia, berriz, Edorta Moreno "Txed"-ek marraztu du.
Bihar ekingo diote Aiaraldea Komunikazio Leihoko langile eta kolaboratzaileek egunkaria ohiko tokietatik banatzeari.