Laudio eta Urduñako udalek adierazpen instituzionalak onartu dituzte, Ekialde Hurbilean, eta bereziki, Sirian, bizitzen ari diren gerrate eta krisi humanitario sakonak eragindako errefuxiatuei elkartasuna eta laguntza adieraziz.
Bi udalek gogorki salatu dute Europar Batasunak 2500 pertsona errefuxiatuen heriotza sortu duen sarraskiaren aurrean abiarazitako politikak, bai eta herrialde ugarik erakutsitako immobilismo eta arduragabekeria.
Exodo masibo hori Mendebaldeko herriek eta Europar Batasunak NATO bezalako erakundeen bidez, urte luzez, Irak, Libia, Afganistan eta Siria bezalako Ekialde Hurbileko herrietan gauzatutako okupazio militarraren ondorio dela adierazi dute eta bertako ezegonkortasun egoeraren erantzule gisatzat jo dituzte.
Jarrera aktibo eta solidarioa
Hori guztia dela eta bi udalek neurriak hartzeko deia zabaldu diote Europar Batasunari, Eusko Jaurlaritzari eta Arabako zein Bizkaiko Foru Aldundiei, eta jarrera aktibo eta solidarioa izan dezaten eskatu.
Urduñako eta Laudioko udalek errefuxiatuak hartzeko prestutasuna erakutsi dute, horretarako beste udalekin koordinatu eta laguntza sare bat sortzeko konpromiso sendoa hartu dute.
Halaber, Urduñako udalak, bere adierazpenean, argi utzi nahi izan du, Urduñako herriak horrelako egoeren aurrean erakutsi duen laguntzeko prestutasuna eta jarrera solidarioa.
Laudioko adierazpenak EHBildu, EAJ, OMNIA, PSE eta PPren botoekin atera da aurrera. Urduñako adierazpen instituzionalak EH Bildu eta EAJ udal taldeen babesaz onartu dute.