Badago natur-zaletasun heroiko bat, itxoite luzez, esnatze goiztiarrez, neke ugariz eta pazientzia eskergaz egina. Erabateko konpromisoa eskatzen du, erdietsitako saria askotan ez baita eskatutako eginahalaren parekoa. Irrikatzen den espeziearen ikustaldi iheskor bat, segundo eskasak iraungo duen begirada trukea, agian irudi batean islatuko dena… ala ez.
Edozein dokumentala ikustean, edo dokumentala posible egiten duen ezagutzaren aurrean, askotan ez gara ohartzen zenbateko neke eta inplikazioa dagoen irudi eder horien atzean.
Badago beste natura-zaletasun zentzuzko eta metodikoagoa, behaketa sistematiko eta programatuez egina, aurretik finkatutako helburu eta prozedura jakinak jarraitzen dituena.
Profesionalek koordinatutako lan hauei esker, naturzale “amateur”-ok ere aukera daukagu apurka-apurka zientzia eta ezagutza eraikitzeko.
Eta hala, SACRE, NOCTUA, SARE, BMS eta holako programei esker, landetako hegazti, gau harrapari, anfibio-narrasti eta tximeletei buruz dugun ezagutza zabaldu egiten da epe luzera egindako jarraipenen bidez.
Jainkoei esker, badago ere beste natura-zaletasun mota bat, alper eta hedonista. Udaberriko lehen beroak iristen direnetik udazkeneko hotzak itzuli arte, gogoz ekiten diot “dolce far niente”-tik hain antzeko den honi.
Ba al dago ba belazean etzanda gure inguruan borborka dabilen belazetako jendearen bizitza xeheak mirestea baino plazer handiagorik?
Gure landa, zelai eta basoetako argiunetan loratzea aspaldi hasi zen. Eta hara non ageri diren, distira koloretsuen artean bere hegaldi ezbaitsu bereizgarriaz, loreen arteko loria, pinpilinpauxak.
Tximeleten unibertsoa zabala eta anitza da oso, ugariak bere espezie eta familiak, sinestezinak helduek nahiz beldarrek beste intsektu edo landareekin sortzen dituzten harremanak, harrigarriak bere metabolismoaren misterioak. Oraingoan, ordea, ezagutza guzti hauek uxatzen ditut, eta eguzkiaren epeltasunean, belazean etzanda, edertasun hegalarien behatze huts eta alaian urperatzen naiz, gero eta sakonago.
Ardo eta arrosa egunak, zioen poetak. Tximeleta egunak, gehituko nuke.
“Though nothing can bring back the hour
Of splendour in the grass, of glory in the flower…”
“Nahiz eta ezerk ez didan unea itzuliko
Belaze arteko disdirarena, lore arteko loriarena…”
William Wordsworth