Tubacex enpresak jakinarazi duenez, ez du datozen hilabetetarako Enplegu Erregulazio Espedienterik baztertzen. Bere aplikazioa uda ondorengo eskarien eboluzioaren araberakoa izango dela diote arduradunek.
Antza, petrolioaren prezioaren jaitsierarekin batera Tubacexek fabrikatzen dituen soldadurarik gabeko altzairu herdoilezinezko tutuen eskaria nabarmen jaitsi da iaztik hona. Egoera dela eta, enpresak fabrikazio kostuak murrizteko epe motzeko neurriak hartu dituela azaldu du, nahiz eta inbertsio estrategikoei eutsi egin dion. Langileei dagokionez ere neurri txikiak hartu dituztela aipatu dute.
Haien esanetan, Arabako fabriketan EEEa aplikatzea saihestu nahi dute. Italian, ordea, aplikatu dute, eta Austrian EEE erdia ezarri dute. Amurrio eta Laudion ekoizpena nabarmen murriztu dela adierazi dute enpresatik, hiru txandetatik bira, zenbait egunetan ekoizpena geldituz.
Hala ere, egoerari aurre egiteko aipatutako neurrien artean, kostuen murrizketari negozioa dibertsifikatzeko plana gehitu behar zaio, petrolioarekiko dependentzia eta nikelaren lurrunkortasuna txikitzeko.
Hori guztia dela eta, zuzendaritzatik aurreikuspen baikorra egin dute. Izan ere, merkatuan duten egoerari erreparatuta, enpresa krisitik indartuta irtengo dela deritzote.
Enpresak eboluzio handia jasan du
Enpresaren azken urteetako eboluzioa oso handia izan da, esportatzen zuen enpresa izatetik, multinazionalera izatera pasatuz. Guztira 12 ekoizpen fabrika ditu, 1900 langileekin. 300 bezerok erosten dituzte Tubacex-en egindako tutuak, 100 herrialdetik gorakoak. Une honetan, soldadurarik gabeko altzairu herdoilezinezko tutuetan mundu mailako lidergoa du.
Datuei dagokionez, 2014an 23,7 milioi euroko irabazi gordinak izan zituzten, 2013an baino %58,3 handiagoak.