Uda ez da bakarrik etortzen, piztu egin behar da. Hala usteko zuten seguru asko udako solstizioa suaren bueltan ospatzeari ekin ziotenek. Udako zein neguko solstizioak, biak ala biak suaren bueltan ospatzeko ohitura zegoen lehen, Juan Manuel Etxebarria irakaslearen esanetan, “baina Gabonetakoa ia-ia galdurik daukagu, baserrietako sutondoak desagertzen joan diren neurrian”.
Hala ere, Etxebarriak azpimarratu du gaur egun bizi duguna ez dela ohitura pagano hutsa. Bere hitzetan, kristautasuna saiatu zen ohitura pagano ugari berera eramaten. “Elizak bazekien herri zaharrarentzat garrantzitsuak zirela uda eta neguaren hasierako egunak. Horregatik, eliz-ospakizun handienetariko bi, egun horietan ospatzea erabaki zuen”. Hala igaro zen udako solstizioaren ospakizuna “San Joan” izatera. Uda suaren bidez piztearen ohitura, baina, mantendu egin da Aiaraldeko zein Euskal Herriko herri gehienetan.
Gaurko San Joan ospakizunak, herriz herri
ARAKALDO 20:30etan, sua eta askaria egingo dira.
AMURRIO Gazte Asanbladak akelarrea egingo du 23an 20:00etan Antzokiko parking-ean.
LAUDIO San Joan Astobitzako jaiak ospatzen ari dira dira 20tik 24ra. Gaur Kirikiñoren umeentzako jolasak, buruhandiak, zanpatzarrak, sua, txokolatada eta Ezten Giro erromeriaren emanaldia egongo dira.
OKONDO Umeentzako jolasak egongo dira, eta sua piztuko da, 19:30etatik aurrera.
URDUÑA Gazte Asanbladak Akelarrea egingo du Makaldian.
OROZKO Hainbat ekintza egongo dira 19tik 24ra.
ARRANKUDIAGA Auzoetan sua piztuko dute.
AIARA Luiaondon eta Murgan piztuko dute sua.