Kontsumobide euskal kontsumo institutuak jakinarazi du 30 iruzur eman direla gas zerbitzuko berrikustearen harira. Horietako batzuk Aiaraldean eman dira eta gainerakoak Busturialdean.
Kasu gehienetan biktimak adineko pertsonak izan dira eta leku isolatuetan bizi dira.
Iruzurraren bitartez 70 euro inguru lapurtu dituzte pertsona bakoitzari.
Baina hainbat kasutan balizko mantenu-kontratuak ere eskaini dituzte, 100 euro gehiago lapurtuz.
Horretaz gain objektuak ere ostu dituztela salatu dute.
Aholkuak
Kontsumobidek zenbait aholku zabaldu ditu iruzurrak ekiditeko. Alde batetik, kontsumo institutuak azaldu du gas zerbitzua 4 urtean behin berrikusi behar dela eta berrikustea 4. urtean ematen dela.
Gainera, baimen legalak dituzten enpresek telefonoz lotzen dituzte aurretik hitzorduak. Ondorioz, inor ez litzateke bat-batean agertu behar berrikustea gauzatzeko.
Kontsumobidek nabarmendu du ez dela inoiz kontraturik sinatu behar eta eskura ordaintzea ez dela zentzuzkoa; gas zerbitzuko ordainketak kontu korrontearen bitartez egiten baitira.
Zalantzak egotekotan, gas zerbitzua ematen duen enpresari deitu behar zaio, ingurutan berrikusteak egiten ari direla ziurtatzeko.
Norbaitek uste badu iruzurra sufritu duela, Laudioko udalean dagoen Kontsumobideko bulegora jo dezake.