Irailaren 21ean bukatuko da Aiaraldea.com web-guneak abiatutako Udako postal lehiaketa. Larunbatean, beraz, agortuko da epea parte hartzeko. Bitartean, aiaraldear orok bidali ditzakete haien argazkiak, baldin eta oinarriak betetzen badira.
Lehiaketa bukatu ostean bi asteko tartea izango du epaimahaiak irabazleak nortzuk izango diren erabakitzeko. 10 sari banatuko dira 5 kategoria ezberdinetan. 5 kategoria horiek hurrengoak izango dira: eskualdeko argazki-postal onena, atzerrikoa, Euskal Herrikoa, jaietakoa eta umoretsuena.
Maila bakoitzean bi sari banatuko dira. Lehenengoek nekazal-etxe batean 2 pertsonentzako egonaldia izango dute Guzurtegi nekazal etxean, Zelaikoetxen, Etxegorri nekazal etxean, Patxikoren etxean eta Artiñanoren etxean, Maroño, Ozekan eta azkenego hirurak Orozkon, hurrenez hurren.
Bigarrenarentzat 2 lagunentzako asteburuko otordua eskualdeko jatetxe batean egongo da hurrengo jatetxeetan: Beldui Txakolindegian eta Balintxarreketa jatetxean Laudion, Bideko jatetxean Amurrion, Hordago jatetxean Baranbion eta Gernika jatetxean Urduñan.
Dagoeneko 120 irudi baino gehiago jaso ditu elkarteak. Argazki asko eskualdean eta Euskal Herrian egin dituzte parte-hartzaileek, baina munduko hainbat txokotatik ere helerazi dituzte irudiak: Errusia, Grezia, Kroazia, Portugal edo Italiatik adibidez. Aiaraldea.com web-atariak lehiakide guztiek egin duten ahalegina eta erakutsitako kalitatea eskertu du.