PSE-EE prentsaurrekoa eskaini zuen atzo bere egoitzan landutako ideiak plazaratzeko. 100 neurri inguru jaso dituzte konpromiso herritar gisa.
Lehenik eta behin ordezkari sozialistek kode etikoa sinatu dute eta baten batek errespetatuko ez balu alderdia utzi beharko luke.
Herriari dagokionez zenbait ildo jarraituko ditu PSE-EEk.
Enplegua
Esparru horretan enplegu planak eta laguntza planak gauzatu nahi dituzte, bereziki autonomo, merkatari, ostalari eta ekintzaileentzat. Klausula sozialak ere txertatu nahi dituzte.
Adineko pertsonak
PSE-EEk azpimarratu du herrian 4.289 pertsona daudela 65 urte baino gehiago dutenak. Haien beharrak aztertuko duen plana abiatu nahi dute.
Laudio herri atsegina bilakatzeko asmoa daukate adinekoentzat eta zenbait neurri planteatuko dituzte haien bizitza errazteko -”enkarguak” egingo dituen pertsona, adibidez, udal esparruan lagunduz-.
Gazteria
Gazteen beharrak asetzeko lonjen araudia prestatu nahi dute sozialistek eta horretaz gain alokairu soziala bultzatzeko eta gazte enplegua sustatzeko planak garatu nahi dituzte. Drogen eta alkoholaren kontsumo arduratsua ere haiekin landu nahi dute.
Gizarte ongizatea
Gizarte ongizatea zeharkako ildoa bada hainbat neurritan, gizarte diru-laguntzen informazio osoa plazaratzeko asmoa dauka PSE-EEk, besteak beste.
Obrak
PSE-EEk konpromiso ugari hartu ditu inbertsioen aldetik: kiroldegia handitzea, antzokia eraikitzea Laudioko dituen behar kulturalen arabera, 600.000 euro bideratzea Laudioko kaleak asfaltatzeko plan baten bitartez, Basaurbeko araztegia gauzatzea, Ugarte, Galmaka, Institutuan eta Landaluzeko gurutzean errotondak egitea...
Konpromisoak etxean
Hurrengo egunetan herritarrek jasoko dute haien etxetan PSE-EEren konpromiso herritarrak jasotzen duen dokumentua.