JOSE ANTONIO MERINOK (BILBO, 1960) Arabako Txakolinaren jatorrizko izena erakundeko idazkari gerentea da. Bertakoa izateak egiten duela berezi dio. “Txakolitonika” edo Txakolin Ibilbidearen bidez jendearen gozamena dute helburu.
Zerk bereizten du Arabako Txakolina?
Bertokoa izateak, barnealdean egina dago, ez kostaldean. Itsasoaren eragina nabari zaio, baina Getariakoak baino gradu gehiago ditu. Eguzki ordu gehiago izaten ditu uztak.
Bizkaiko Txakolina probintzia osoak hartu du. Arabakoa, aldiz, Aiarako haranak. Beste ezaugarri bat txinparta eza da, normalean ez baitu izaten.
Txakolinaren ibilbidea sortu duzue. Zertan datza?
Oso garrantzitsua da gure herrialderako. Oso inportantea da turismoarentzako. Menu gastronomikoa ere abiatu dugu, beste kultura bat da, baina jende asko mugitzen du. Arabak bi Jatorrizko Izendapen ditu: Errioxakoa eta Arabakoa. Ibilbideak Nerbioi Goiena zeharkatzen du. Urduña ere barnean dago. Guztira, Arabako bost upategi eta bizkaiko bat batzen ditu. Urduñan, Okondon eta Laudion bana daude eta Amurrion bi. Ibilbidearen baitan upategia bisitatzeko aukera, bazkaria eta mahastiak ezagutzeko aukera eskaintzen du Aiaraturrek.
“Jendeak gauza berriak behar ditu. Txakolitonika oso suabea da, eta udarako oso egokia”
Txakolitonika, txakolin menua... edari tradizionala modernizatu duzue!
Bai! Azken finean gauza berriak topatu behar dira, denborak gustuak aldatzen ditu eta. Jendeak gauza berriak behar ditu. Ardo txuria Sprite edariarekin nahasten den bezala, txakolina tonikarekin elkartu dute taberna batzuek. Jendeak beldurrik gabe edatea bilatzen dugu, alkoholak autoa tarteko badago beldurtu egiten du eta. Txakolitonika oso suabea da, freskagarria. Nik uste udarako edari oso egokia dela.
Txakolin eguna antolatu duzue. Festatik ala lanetik, nondik du gehiago?
Ekoizleek gogor egiten dute lan kalitatezko txakolina plazaratzeko. Amurrioko Txakolin eguna horren adierazle da. Momentuz Arabako txakolina bakarrik ateratzen dugu. Hala ere, gure asmoa, beste leku batean Txakolin Ibilbidearen eguna antolatzea da, zeinetan upategi guztiak hartuko duten parte.
Nola ikusten duzu Txakolinaren etorkizuna?
Nik ilusio handia dut. Gure Jatorrizko Izendapena txikia da baina indar handia du. Kalitatea gero eta handiagoa da eta bertako zein atzerriko salmentak ere bai.