Bihar argitaratuko da Aiaraldea Egunkariaren 34. zenbakia. Normalean baino lodiagoa izango da, ohikoan dituen orrien bikoitza izango baitu: 32.
Hauteskundeei begirako gehigarria
Hamasei orri gehiago, bi eduki berri plazaratzeko. Alde batetik, datorren maiatzaren 24an izango diren Udal eta Foru hauteskundeei begirako gehigarria topatu ahal izango du irakurleak. Udal-hauteskundeek eskualdean izan dute bilakaeraren inguruko datuak, hauteskunde-sistemari buruzko analisiak (Miren Ayesak, Mari Petralandak eta Asier Amondok idatzitakoak) eta herriz-herrikako artikuluak izango ditu gehigarri horrek, hautagaiek egunkarirako propio idatzitako zutabeekin batera. Eskualdeko talde politiko guztiei helarazi zaie zutabea idazteko gonbitea, eta orotara 33 hautagai animatu dira hori egitera.
Txakolin Egunaren gehigarria
Beste aldetik, maiatzaren 31an Amurrion egingo den Txakolin Egunari begirako beste gehigarri bat izango du egunkariak, Aiaraldeko txakolinari eta upategiei buruzko informazioaz hornitua.
Egunkarian, eduki anitzak
Gehigarriak albo batera utzita, ohiko egunkari batekin topatuko da irakurlea. Herriz herrikako atalean eskualdean azken hamabostaldian gertatutako albiste esanguratsuen bilduma egongo da. Kirol atalean, berriz, eduki ugari egongo dira, ohikoan baino orri bat gehiago izango baitu atal horrek. Itxaso Agirre Gravni txapeldunari eginiko elkarrizketa eta Laudior Zikloturista Egunaren inguruko kronika egongo dira, besteak beste. Sozio-ekonomian, berriz, lan-istripuek eragindako heriotzek hartuko dute protagonismoa.
Egunkariko protagonista nagusia, baina, Carlos Varela komikigile eta animatzaile artziniegarra izango da. Luze eta zabal hitz egingo du bere ogibidearen egoeraren eta buruan dituen proiektuen inguruan.
Kontrazaleko protagonista, berriz, Iratxe Llano urduñarra izango da, Ta-Tarra Kartoi Bandaren sortzailea.
Kolaboratzaileei dagokionez, Txema Urkijok, Itziar Larrazabalek, Juan Manuel Etxebarriak eta Mire Ayesak idatzi dituzte iritzi-zutabeak. Komikia Jabi Isasik egin du eta zinema proposamena Txetxu Urkijok.