aiaraldea.eus

Iristear dago Korrika Aiaraldera

Erabiltzailearen aurpegia Erredakzioa  Aiaraldea
Iristear dago Korrika Aiaraldera

Ordu gutxi falta dira Korrika eskualdera hel dadin. Okondotik sartuko da egunsentiko 02:16an, Laudiora jotzeko 02:55ean. Ia ordubete beharko du Korrikak Laudio zeharkatzeko baina 03:47an Luaiondon egongo da, Murgan aldiz 04:07an. Handik Arespalditzara igoko da Korrika eta 04:33an helduko da gero Izoriara joateko, 04:45ean hain zuzen.

Ordu gutxi falta dira Korrika eskualdera hel dadin. Okondotik sartuko da egunsentiko 02:16an, Laudiora jotzeko 02:55ean. Ia ordubete beharko du Korrikak Laudio zeharkatzeko baina 03:47an Luaiondon egongo da, Murgan aldiz 04:07an. Handik Arespalditzara igoko da Korrika eta 04:33an helduko da gero Izoriara joateko, 04:45ean hain zuzen.

05:05ean Bizkaian barneratuko da Korrika, Belandian alegia. Gora doan errepidea jarraituz Lendoñon elkartuko dira euskaltzale korrikalariak 05:31ean. Urduñan 05:55ean dauka hitzordua Korrikak. Berehala Arabara itzultzeko, Saratxotik 06:31ean igaroko baita.

Amurrioarrek Korrikara elkartzeko parada izango dute goizeko 06:50ean eta azkenengo etapatan sartuko da lasterketa Lezaman 07:29an. Baranbio zeharkatu eta gero Zioarragan agurtuko du Korrikak Aiaraldea 08:03an.

Beroketa ekitaldiak nonahi

Egun luzea eta bizia izango da gaurkoa. 15:30ean Areta eta Urduñako Korrika Txikiak egingo baitira. Urduñako Foru Plazan txokolatea emango dute eta 20:00etan Dantza Plaza eta sagardoa eskainiko dute. Bihar goizeko 06:00etan txokolatea eskainiko dute Gaztetxean ere eta ordu berean suziriak jaurtiko dituzte.

Amurrioko Euskaltegian gaur 18:30ean Korrikaren inguruko argazki eta bideo zaharren emanaldia egongo da.

Laudion jendea ohera joan ez dadin Batukadak joko du arratsaldeko 20:00etan Herriko Plazan eta 21:30ean afari herrikoa antolatu dute Basalarrinan -tiketak salgai daude Iratxo eta Ilargi tabernetan-. Hori gutxi balitz kontzertua eskainiko du Atxurre taldeak Gaztetxean 23:00etan. Eta gero kantukada egongo da.

Korrikak ez du etenik

Martxoaren 29an bukatuko da Korrika Bilbon, baina bitartean hitzordu gehiago daude ekimenari lotuta eskualdean. Hurrengo egunetan Korrika Txikiak ez ezik jarduera kulturalak gauzatuko dira. Guztiak Aiaraldea.eus web-atariaren agendan jasota daude.



Ikusi argazki guztiak handiago

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa