Bihar (martxoak 17) argitaratuko da 19. Korrikari buruzko Aiaraldea Egunkariaren zenbaki berezia. Euskararen aldeko ekimen horren hainbat aspektu jorratuko ditu egunkariak. Korrikaren sorreran parte hartu zuten sei aiaraldearrekin egindako mahai-inguruari buruzko artikuluarekin hasiko da, jarraian beste hainbat gaira salto egiteko.
Elkarrizketek presentzia nabarmena izango dute: Aitor Alava eta Marina Aranguren (Argentinan bizi diren euskaradunak), Brenda Castrillo Valle (euskaraz ikasten ari den nikaraguarra), Ane Moreno (Korrikaren lehenbiziko edizioetan furgonetan animatzaile gisa aritutako aiaraldearra) eta Asier Amondo (Korrikaren koordinatzaile orokorra) izango dira elkarrizketatuak.
Agendaren atalean, berriz, Korrika Kulturalaren ekintza guztiak kontsultatzeko aukera izango du irakurleak.
Zutabegile berriak
Zutabegileak ere zenbaki horretarako espresuki lotutakoak izango dira. Hala, honako aiaraldear hauek Korrikari buruz dituzten iritzi, sentimendu eta abarrak plazaratuko dituzte: Irati Usia, Anakristi Gutierrez-Barquin, Joseba Egiguren, Anuntxi Arana, Juan Jose Arto Rodriguez "Pelukas" eta Irati Mendiguren Cosgaya.
Egunkaria ohiko lekuetan banatuko dute Aiaraldea Komunikazio Leihoko langile eta bolondresek, bihar goizetik aurrera.