Datorren martxoaren 25ko goizaldean igaroko da Korrika Aiaraldetik. Baina Korrikarekin batera herriz-herri antolatu ohi diren kultur egitarauak martxan daude jada. Laudio, Amurrio eta Urduñan dozenaka kultur ekintza prestatu dituzte. Ekintzetako asko AEKko ikasle eta ikasle ohiek antolatu dituzte.
Laudion gaur (otsailak 26) hasiko da Korrika Kulturala. Asier Otamendik bere bidaiei buruzko diaporama aurkeztuko du, Basalarrina Topagunean, arratsaldeko zazpietan. Martxoaren 14an, berriz, Bertso-korrika egongo da Arrainope tabernan. Horretaz gain, Baserritar eta artisauen azoka (martxoaren 14an), mendi martxa (22an), Desetxufatuak antzezlana (23an), galletak egiten ikasteko tailerra eta kantu jira (27an). Korrikari harrera egiteko, berriz, batukada eta kontzertua egongo dira.
Amurrion martxoaren 18an izango da lehen ekintza, Infinite scarf ikastaroa. Hurrengo egunetan running-ari buruzko hitzaldia (23an), Korrikaren argazki eta bideo zaharren proiekzioa (24an), antzerkigintzari buruzko solasaldia (25an), Nafarroako kanta taldearen kantu-jira (26an) eta Babiora martxa (28an) egongo dira.
Urduñan ipuin kontalaria (26an) eta Euskal kanta herrikoiak (28an) egongo dira, eta Korrika igaro ostean txokolatada egingo da Gaztetxean.
Korrika txikiak
Eskoletako haurrek, ohiko lez, euren Korrika propioa izango dute. Amurrio eta Urduñan martxoaren 27an egingo da eta Laudion 26an.