“Aiaraldean lan, bizi eta ikasi” dinamikak eskualdeko gazteak mobilizatzera deitu ditu ostiralean, arratsaldeko 19:00etan Amurrioko herriko plazatik. Dinamikaren izen berdinaren lelopean mobilizatuko dira hezkuntzaren pribatizazioaren kontra, etxebizitza duina lortzeko zailtasunen aurrean edota lan munduak inposatzen duen prekarietatea salatzeko.
Izan ere, Aiaraldeko gazteak urteak daramatzate krisiak eragiten dituen arazoen kontra lanean, horren adibide da iazko ekainean egindako mobilizazioa.
“Antolatzean, eraikitzean eta borrokatzean dago gakoa, ezinbestekoak hirurak. Antolatu. Zapaldu guztien artean bloke bat osatu eta eragiteko ahalik eta gaitasun gehien izateko. Eraiki. Egoera latzenetan ere alternatibak eraikitzeko gai garela erakutsi duelako historiak, eraiki dezagun gaurdanik guk nahi dugun etorkizuna.... eta borrokatu. Borroka delako alternatibak eraikitzeko, erantzuleak markatzeko eta gure jarduna aurrera eramateko bide bakarra! Gazteok erabaki dugu kaleak hartzera goazela, borrokarako hautua hartu dugu. Egoerari buelta eman ahal zaio eta hori gauzatzera goaz, gure etorkizuna marraztu eta eraikitzera goaz! Bete ditzagun Amurrioko kaleak gazteon aldarriz eta gazteon konpromezuz.” adierazi dute antolatzaileek.
[video:https://www.youtube.com/watch?v=sjYk8MUj5gQ width:600 height:350]