Tubacex enpresak Munbain izenpetutako akordioaren harira, Indiako Prakash enpresako soldadurarik gabeko hodi herdoilgaitzen saila eskuratu berri du. Enpresak, operazio hori taldearen Plan Estrategikoaren barruan kokatzen du.
Indian lantegia erosita, munduan soldadurarik gabeko hodi herdoilgaitzen fabrikazioan buruan jarri da enpresa aiaraldearra; merkatu zein ekoizpen aldetik produktu horien ekoizle nagusia bihurtu da Tubacex taldea.
Eskuratu berri duen lantegiak urtean 5.000 tona ekoizten ditu eta 250 langilez osatuta dago, fakturazio aldetik urtean 25 milioi euro inguruan aritzen delarik.
Azken urteetan munduan hainbat enpresa eskuratu izan ditu taldeak; duela hilabete gutxi Italiako IBF enpresa erosi izana iragarri eta gero, asko dira taldearen presentzia duten herrialdeak: EEBB, Austria, Txina edota Brasil esaterako.
Momentuz, zaila da eskuratze horrek Tubacex taldeak Aiaraldean dituen enpresetan izango duen eragina neurtzea; azken urteetan taldeak munduan barrena enpresen erosketa ugari egin izan baditu ere, Amurrio zein Laudioko lantegietan ere inbertsio garrantzitsuak gauzatu baititu.