Aurreko asteazkenean eratu zen Aiaraldeako ur tratamendu berria kudeatzeko mahai inter instituzionala. Kantauriko Urkidetzak abenduaren 5ean erakunde ezberdinez osatutako bilgunea eratzea erabaki zuen, uren gestioan inplikatutako erakundeek eskualdeko ur zikinak garbitzeko eratutako plana kudeatzeko asmoz.
Urkidetzarekin batera, Kantauri isurialdeko Konfederazio Hidrografikoa (Nekazaritza, Elikadura eta Ingurumen Ministerioa ordezkatuz), URA-Ur Agentzia (Eusko Jaurlaritza ordezkatuz) eta Araba eta Bizkaiako Foru Aldundiak erakunde arteko organoa osatzen dute.
Erakunde hauen ordezkariak, eskualdeko ur zikinak garbitzeko planaren jarraipena egiteko bilduko dira. Horrez gain, planak oztoporik izan ez ditzan, komunikazioa erraztu eta erakunde ezberdinen arteko elkarrekintza bermatzea bilatzen dute.
Hala, Juan Jose Yarrituren hitzetan, garatu behar diren epe labur eta luzerako ekintzen aurrean “eskualdeko herritarrei, erakundeen arteko estrategia koherente eta bateratua aurkeztu behar zaio”.
Lehen batzarrean, erakundeen arteko mahaia eratu eta ordezkarien aurkezpena egiteaz aparte, eskualdeko ur zikinak garbitzeko planak ingurumenean izango duen eragina aztertu zen, horren harira jaso ziren alegazioekin batera.
Aipatutako batzarrean, plana garatzeko behar diren lurzoruak eskuratzeko URA eta Urkidetzaren arteko hitzarmena sendotu eta desjabetzeak kudeatzeko, Arabako Foru Aldundia eta Urkidetzaren arteko beste hitzarmen bat proposatu zen.