Aratusteek harrera ona daukate Aiaraldean. Artziniega izan da ospakizunei hasiera eman dion lehen herria. Bihar adibidez, Gure Artea Ikastetxeko umeak kalera aterako dira mozorroturik 11:30ean eta 17:30ean ipuin kontalaria egongo da liburutegian. Ostiralean, berriz, umeentzako jolas txokoak izango dituzte kiroldegian.
Ostiralean ere helduko dira Aratusteak Okondo, Orozko, Arrankudiaga-Zollo eta Aretara. Aretako Kultur Etxean disko festa egingo dute; umeentzat 18:00etan eta helduentzat 21:30ean. Okondon kalejira egingo dute 15:00etan eskolatik abiatuta, eta 17:00etan dantzaldia jubilatuen etxean. Orozkon, aldiz, umeentzako ikuskizuna prestatu dute Donibane Aretoan 18:30ean. Arrankudiagako Gizarte Etxeak, berriz, Erdi Arora egingo du jauzi; afaria eta karaokea ardatz izango dituen mozorro festa antolatu baitute.
Larunbatean, ekitaldi ugari
Larunbatean zipriztinduko dituzte Aratusteek eskualdeko leku gehienak.
Luiaondon 17:00etan abiatuko dute kalejira Malato Zuhatzetik. Urduñan 17:30ean hasiko dira ospakizunak.Artziniegan bi gune ezberdinetan ospatuko dute jaia. Frontoian 18:00etan Disko Txikia egongo da, eta Goiko Plazan 18:30ean tostada lehiaketa. Amurrion Kakarro Birigarro izango da protagonista. Ospatzeko desfilea 19:30ean hasiko dute Mariaka eta Marigabon erraldoiek Andra Mari Elizan. Laudion desfilea Ugarte plazatik aterako da 18:30ean, Aldai Plazan bukatzeko. Herri guztietan sariak banatuko dituzte.
Urduña izango da igandean ospakizunekin jarraituko duen toki bakarra, Santa Zezilia bandak kontzertua eskainiko baitu.
Astelehenean eta asteartean 17:00etan mozorro lehiaketa, buruhandien tailerra eta kalejirak egingo dituzte Luiaondo eta Arespalditzako ludoteketan.Asteartean umeek Amurrio, Laudio eta Urduña herrietako plazak hartuko dituzte, ekitaldi ezberdinak egongo baitira bertan. Amurrion 18:30ean erreko dute Judas Kakarro eta Laudion 19:00etan Lezeagako sorgina.