Naturayalako kide batek zenbait hausnarketa islatu ditu taldeak duen blogean elurraren eta egoera sozialaren inguruan:
"
Elurra iritsi da. Izar zuri ederrak inguruko gainak estali ditu, bere argitasun garbiz azpiko lokatzak eta zikinkeriak ezkutatuz.
Krisia iritsi zen. Aurrena, batzuk kapitalismoa birsortu behar zela zioten. Gero esan zuten neurriz gain gastatu genuela. Geuk. Hiritarrok. Gure ahalbideen gainetik bizi izan garela. Apaltasunez bizitzen ikasi behar genuela. Gauzak ez zirela sekula lehen bezalakoak izango.
Urte batzuk pasa dira. Pobrezia eta langabezia bere horretan dirauten arren, oraingoan krisitik atera omen gara, eta hotzikaraz hasten naiz.
Ez zegoenean, ez dira milioiak faltatu izan abiadura handiko trenarentzat, gure ibaien urak “per secula seculorum” araztegirik gabe daudelarik.
Orain, egoera zertxobait hobeagoa izanik, auskalo zenbat dossier urbanistiko berpiztuko diren, zonbien antzera, guztion ondarea den paisai eta ingurunea gutxi batzuen mesedetan izorratzeko. Saratxoko saihesbidea aurrena, noski.
Gero batek daki, Los Olmos agian, eta bitartean Fracking-aren aldeko lobbyak jarraituko du itzalean bere lana egiten. Mehatxu hauen aurrean, baserritar batzuen hesi bizien erausketak eulika dirudite…
Elurra iritsi da. Goiz eder honetan Urduñara eta Arrastariako landetara hurbildu naiz.
Urduñako udalak Aranzadi zientzi elkarteari utzitako Larrinzarko eremua bisitatu nahi nuen, Arrastariako beste putzu batzuekin batera.
Airearen gardentasunean, ederrak ageri dira Salbadako tontor elurtuak. Larrinzarreko hiru putzuetan igel jauzkariak hasi berriak dira bere ugal sasoian murgiltzen. Urazpiko landaretzan iltzaturik, hor ageri dira arraultz piloak.
Garaiago, Salbadako putzuetan, igel gorriek lehenago ospatu zituzten ezteiak. Holakoak dira naturaren erritmoak.
Aurrena temporariak, gero dalmatinak. Neguan ere bizitza ageri. Miru saldotxo bat planeatzen dabil, haizea hegal puntaz ferekatuz.
Artalde baten ondoan, lertxuna pausatu da zelaian, agian ardiek uxatutako zomorroren bat jan nahiean. Bere silueta luzexkaz, artzaina dirudi.
Elurra iritsi da. Izar zuri ederrak inguruko gainak estali ditu, bere argitasun garbiz azpiko lokatzak eta gure miseriak estaliz."