ESTIBALIZ DOMINGUEZ (Arespalditza, 1983) Amukatu Elkarteko kidea da. Elkarte berri horren helburua eskualdeko katu basatiak zaintzea da kontrolpean izateko. Lokala lortu dute Urduñan eta laster lanean hasiko dira Estibaliz eta gainontzeko kideak; Rubén Bermúdez, Ane Calongue, Belén Diego eta Andrea Vidal.
Zergatik pentsatu duzue animalien babeserako elkartea sortu behar dela?
Amurrion elkartu ginen Eroskin lan egiten duen neska batekin. Berak katu kolonia bat elikatzen du. Ikusi gintuen katuentzako janaria erosten eta galdetu zigun ea katurik genuen.
Horren harira animalien babeserako elkarte ezberdinetako 4 edo 5 pertsona elkartu ginen. Printzipioz asmoa da animaliak elikatzea baina dirua lortuz gero helburua da emeak esterilizatzea katuen kopurua kontrolik gabe ez hazteko.
Katu gaixoak zaintzen ditugu eta txikiei etxea bilatzen diegu, hori da gutxi gorabehera gure lana.
Amurrion hasi gara baina asmoa da eskualde osoan lan egitea.
Erreferenteren bat duzue?
C.E.S. proiektua hartu dugu erreferentetzat -prozedura katuen harrapaketan, esterilizazioan eta askatzean datza-. Kalean bizi diren katuak ez baitira ohitzen etxe batean bizitzera.
Bilbon, Gasteizen, Arrigorriagan eta Basaurin abiatu dute dagoeneko C.E.S. proiektua. Helburua da koloniak kontrolatzea.
Zuen proiektuak zeintzuk dira?
Urduña egon gara gaur bertan eta lokal bat utziko digute. Asmoa da katuak kalean jasotzea norbaitek bere etxea jaso ditzan.
Jaten dutena ere kontrolatu nahi dugu; janari egokia izan dezaten eta zaborretan jatea ekiditea, gaixotu ez daitezen.
Finean katu basatiak kontrolatzea nahi dugu elikadura eta osasunaren aldetik.
Amurrion ere proiektua aurkeztu dugu baina erantzunaren zain gaude.
Katuekin bakarrik lan egingo duzue orduan?
Printzipioz bai, elkartea ondo joango balitz txakurrekin lanean hasiko ginateke. Baina une honetan oso gutxi gara. Askoz gehiago ezin dezakegu egin.
Zein da katuen egoera eskualdean?
Osasuntsua. Erreskatatu ditugunak osasunaren aldetik ondo daude. Elikatuta daude jendeak janaria ematen dielako.
Baina ez daude kontrolpean. Badaude koloniak 15 edo 20 katuk osatzen dituztenak eta hori kontrolatu behar da.
Katu gehienak kalean jaio dira zuzenean.
Elkartea sortu baino lehen beste elkarte batzuetan aritu zarete, ezta?
SOS Bilbo elkartekoak gara pare bat, beste bat SOS Felinos elkartekoa... guztiok gaude harremanetan animalien babeserako elkarteekin. Batzuk boluntarioak dira eta aterpea garbitzera joaten dira.
Baina gure elkartea sortzea erabaki dugu orain.
Elkarte guztiak gainezka daude eta ekarpen ekonomikorik ez dutenez jasotzen, katu berririk eramatekotan nekez hartzen dute, gehiegi baitituzte.
Eta hemen abandonatutako katuak ere badaude. Hemen ere horrelako elkartea beharrezkoa da.
Ekintza publikoren bat egingo duzue elkartea aurkezteko?
Momentuz identifikazio fiskal kodea gaude egiten. Gero triptikoak banatuko ditugu eta zerbait antolatzea ondo legoke, baina prozesuan gaude oraindik.
Eta norbaitek lagundu nahi badu edo katu bat topatzen badu, nola jar daiteke zuekin harremanetan?
Facebook kontua daukagu, Amukatu Elkartearen izenean. Bertan telefono zenbakia eta helbide elektronikoa topatuko dute (amukatu@gmail.com, hain zuzen).