Aiaraldeko musika ekoizleek azken bultzada eman diote bere jarduerari eta zenbait proiektu kaleratu dituzte. Amurrioko Five Corners rock taldeak bere disko berria “Nork bere bidea” aurkeztu du dagoeneko kontzertuen bitartez, Amurrion eta Laudion hain zuzen. Badok musika plataforman zenbait abesti entzuteko parada dago, interesa izanez gero.
Priscilla Band Fnac-en
Priscilla Band eskualdeko herri ezberdinetako musikariek osatzen dute, Amurrio, Artziniega eta Laudiokoak besteak beste. Urtarrilaren 8an kaleratuko dute bere bigarren diskoa; “Xalala kale”. Egun berean kontzertua eskainiko dute doan Bilboko Fnac dendan Bi Fm irratiak lagundurik. Kontzertu ugari izan ditu funk taldeak 2014an eta gehiago emango ditu 2015ean bere diskoaren eskutik.
Politburo Recording Fiasco disketxea
Bestalde, Politburo Recording Fiasco eskualdeko musika zigilu independenteak bi disko kaleratu ditu urte amaieran; Los Nitxos eta Viva Bazooka taldeenak, alegia. Talde biak Gasteizkoak dira nahiz eta musika mota ezberdina lantzen duten; post-punk egiten du Los Nitxos-ek eta bikote instrumentala da Viva Bazooka. Binilo diskak dira biak.
Perdido Entre Ilusiones bakarlariak ere diskoa egin du urte amaieran eta Mankaos talde laudioarrak laster hasiko du bere hurrengo diskoaren grabaketa, maketa egin ostean.