Ernai gazte antolakundeko kideak eskualdeko zenbait herrietan dinamika berria garatuko dute hurrengo asteetan. “Denak ala inor ez” dinamika sortu zuten bezala preso eta iheslarien aldeko konpromiso eta praktikak aurrera eraman ahal izateko, ekimen horren barruan “11 konpromiso, askatasunerantz!” lemapean, abenduaren 19tik 30era bitarte eskualdean baraualdiak eta hainbat ekimen antolatuko dituzte. Abenduaren 30ean espetxera egingo duten martxarekin bukatuko dute.
Asteburuan zehar “Denak ala inor ez” guneak zabalduko dituzte Laudio, Amurrio eta Orozkoko plazetan eta zenbait gazte baraualdian dauden bitartean, preso eta iheslarien aldeko keinuak egiteko aukerak emango dituzte. Horren ostean eta abenduaren 30ean egingo duten espetxera martxa bitartean, senideen hitzaldiak eta hainbat ekimen antolatuko dituzte Aiaraldean zehar.
Denak ala inor ez leloak dioen moduan, azken preso eta iheslaria etxean izan arte borrokan jarraituko dutela adierazi dute eta hori lortzeko ezinbestekotzat ikusten dute gazte guztien konpromiso eta ekarpena. “Konpromiso txiki zein handi, guztion indarraz lortuko dugu preso eta iheslariak etxeratzea.”
Horretarako “11 konpromiso, askatasunerantz!” abiatu dute edozein motatako konpromisoak direlarik hartzeko; banderola bat jarri etxean, senideei bisitak egitera lagundu, mobilizazioetan parte hartu, gutunak idatzi... eta gazte guztiak animatzeko.