Arabako hizkuntzak eta hiztunak mundu eleanitzean lelopean euskararen egoeraren inguruan hausnartuko dute hainbat adituk Artium Museoan bihar eta etzi.
Arabako Foru Aldundiak antolatu ditu jardunaldiak eta sarrera doakoa izango da. Bi egunetan eredu bera erabiliko dute, bihar Javier de Andrések aurkezpena egingo duelarik 18:30ean.
Horren ostean Joakin Gorrotxategik hartuko du hitza “Arabako (eta inguruko) hizkuntzak antzinatean” hitzaldia eskaintzeko. Gero Koldo Zuazok eta Elena Martinez de Madina mintzatuko dira, “Arabaren lekua euskalkien sorkuntzan” eta “Arabako toponimia: gure hizkuntzen lekuko” solasaldiekin hurrenez hurren.
Eguna bukatzeko mahai-ingurua gauzatuko dute hiru hizlariek, Gidor Bilbao koordinatzaileak eztabaida zuzenduko duelarik.
Abenduaren 18an hiztunak izango dira ardatza. Hasteko, 18:30ean Jose Mari Velez de Mendizabalenak “Hiztunak Arabako gizarte desberdinetan XX. Mendean” saioa gidatuko du. Ondoren, Iñaki Martinez de Luna arituko da “Arabako hiztunak XXI. mendeko eleaniztasunean” hitzaldiaren bitartez eta Esti Amorrorturen txanda helduko da horren ostean “Hizkuntza-identitatea eta legitimitatea euskararen hiztun berriengan” solasaldiaren eskutik.
Jardunaldiak hiru hizlarien mahai-inguruarekin bukatuko dira eta Ane Pedruzo koordinatzaileak gidatuko du iritzi trukaketa.
Antolatzaileek itzulpen zerbitzua eskainiko dute.