1.769.700 eurokoa izango da Aiarako Ur Partzuergoaren 2015eko aurrekontua. Hori onartu zuten partzuergoaren iragan asteko bilkuran. Aurrekontua onartzeaz gain, datorren urterako udal eta batzar administratiboentzako ur-tasa ere onartu zuten bilkuran: 0.373 euro ordaindu beharko dute Artziniega, Amurrio, Aiara, Okondo eta Laudioko Udalek ur metro kubiko bakoitzeko. Horrek %0.19ko igoera suposatzen du. Partzuergotik adierazi dutenez, ur-horniduraren gastuak igo egin dira eta kontsumoa jaitsi, eta horrek tasa igotzea dakar nahitaez, gastuak kitatu behar direlako.
Aurrekontu horrekin datorren urtean egingo diren inbertsioen artean, honakoak daude: Artziniegako urtegia eta Laudioko San Bartolomeko araztegia Izoriako kontrol-gunera lotzea edota San Bartolome, Lexartzu eta Artziniegako ur-biltegiak berritzea. 300.000 euro inbertituko dira horretan.
EAJ, aurrekontuarekin ados
Eusko Alderdi Jeltzalea aurrekontuaren alde azaldu da. EAJk aurrekontuen alde bozkatu zuen, baldintza batekin: bulego bat erosteko baliatuko ziren 337.000 euroak “ur-hornidura bermatzeko beharrezkoak diren azpiegitura batzuk” finantzatzeko erabiltzea.
Hala, diru hori 2016an egitea aurreikusia zegoen berrikuntza bat aurreratzeko baliatuko dela azaldu dute jeltzaleek: Artziniegako presaren urrutiko aginterako kontrolaren birmoldaketarako. “Erregistroen kudeaketan garrantzia duen elementu bat da, presaren segurtasunerako eta datuen kudeaketarako balio duena”, adierazi dute EAJtik. Hortaz gain, Alderdi Jeltzaletik gaineratu dute Laudioko araztegiaren berriketarako data 2017tik 2016ra aurreratu dutela. Partzuergoko ordezkari guztiek bozkatu zuten aurrekontuaren alde, Laudioko Alkatea den Natxo Urkixo izan ezik, abstenitu baitzen.
Mahai instituzionala, Amurrio eta Laudion hondakin-urentzako araztegiak jartzeko
Hainbat inbertsio onartu diren arren, Nerbioi-goiko saneamendu planean planteatzen ziren helburuetara iristeko bide luzea dago oraindik egiteko. Honako azpiegitura hauek 2020rako martxan jartzea planteatzen zuen planak: kolektore-sarearen instalazioa eta hondakin-urentzako Laudio eta Amurrioko araztegien eraikitzea. Araztegi horiek 75 milioi euroko inbertsioa beharko luketela aurreikusia dago.
Horren inbertsio altuek Foru Aldundien eta Espainiar Gobernuaren laguntza ekonomikoa behar dute. Horregatik, inplikatuak dauden instituzio guztien arteko mahai bat osatzea onartu zen partzuergoko bilkuran. “Proiektua ezin daiteke gehiago atzeratu”, adierazi zuen partzuergoko presidentea den Juanjo Yarrituk, “Europaren begi-puntuan gaude, eta Espainiar Gobernuak zein Jaurlaritzak badakite hori”.