Ohikoa da honakoa gertatzea: saltoki edo taberna batean sartu eta dendari/zerbitzaria euskaraz dakien ez jakitea eta, ondorioz, gaztelerara jotzea, badaezpada. Joera horri aurre egiteko asmoz hainbat kanpaina jarri dituzte martxan Aiaraldeko zenbait udalerrik aurten. Kanpaina horien fruituak Laudio, Amurrio eta Orozkoko 113 saltoki eta tabernetan topatu daitezke: komertzio horietan sartzerakoan dendariaren argazki bat ikusi ahal izango dute herritarrek, berarekin euskaraz egin dezaketenaren seinale.
Orozkon iaz jarri zuten martxan kanpaina, Ugaorekin batera, “Egin daigun euskaraz” lemarekin. Herriko sei saltoki eta tabernek hartu zuten parte ekimenean eta, euskaraz komunikatzeko gai diren langileen argazkiak jartzeaz gain, eskaintzen zituzten produktuen izen eta prezioak ere euskaratu zituzten. Laudion eta Amurrion, berriz, “Nirekin euskaraz” da erabili dute lema.
Laudion 85 saltokik hartu dute parte egitasmoan hasiera batetik, 130 langilek guztira. Amurrioko kanpainan, berriz, 22 saltokik hartu dute parte hasiera batetik, 34 langilek.
Konpromiso berriak, bidean
Hiru kanpainek harrera positiboa izan dute merkatari eta hostalarien artean. Laudion, esaterako, saltokietako langileen %73k adierazi du jende gehiago zuzentzen zaiela euskaraz argazkiak jarri zituztenetik.
“Ekimen erakargarria da”, Indriska tabernan lan egiten duen Jakin Artarazen hitzetan, “argazkia ikusita, bezero batzuk animatu egiten dira eta euskaraz hitz egiten dizute”. “Ideia oso ona izan da”, adierazi du Zuentzat dendako Jose Abasolok, “nik uste dut jendea ohartu dela eta asko euskaraz hitz egiten saiatzen direla”. Merkatari eta ostalarien %97 prest dago konpromiso gehiago hartzeko, jendartean horren garrantzitsua den sektore horren euskalduntzeari begira.