Datorren maiatzean bukatzera doan legegintzaldia historikoa izango da euskararen erabilerari dagokionez: Aiaraldeko udalerrietan gobernatzen aritu diren alkate guztiak euskaraz komunikatzeko gai izan baitira, historian lehenbiziko aldiz.
Handia izan da 2006-2011 legegintzalditik hona eman den aurrerapausoa. Izan ere, lau urte haietan eskualdean gobernatzen egon ziren bederatzi alkateetatik hiru baino ez ziren gai euskaraz komunikatzeko.
Euskara, “alkatea izateko beharrezkoa”
Eskualdeko alkateen artean, nork bere euskara-maila du. Dena den, aho batez diote denek euskara “beharrezkoa” dela alkate izateko.
Amurrioko alkatea den Josune Irabienek, adibidez, urteak eman ditu euskara irakasle zein euskara teknikari moduan, eta ziurtatu du legegintzaldi honetan alkate guztiek euskaraz jakiteak zenbait gauza ahalbidetu dituela, “bilera batzuk euskara hutsez egitea, adibidez”. Josu Artetxe Aiarako alkatearen ustez, “aurrerapauso handia” eman da legegintzaldi honetan.
Arrankudiagan euskara hutsez egiten dituzte udal osoko bilkurak. Aiaraldean halakorik egiten den lehenbiziko aldia da. Herriko alkate den Itziar Duoandikoetxearen hitzetan, Euskal Herrian egonda, beharrezkoa da euskaraz jakitea.
Natxo Urkixo Laudioko alkateak bat egiten du baieztapen horrekin: “edozein kargu publiko betetzeko gaztelania eta euskara jakitea beharrezkoa da, hiztunen beharrei erantzun ahal izateko”. Orozkoko alkate Josu Sanpedroren adierazpenak ere ildo beretik doaz: “Imajinatzen duzu Espainiako presidente bat espainieraz hitz egiten ez dakiena?”.