Naturayala blogeko kidea den Patxi testu eta argazki interesgarriak argitaratu ditu:
"Aintzineko kronika eta izkribuetan aipatzen denez, aspaldiko garaietan Eireko irla (Irlanda) Tuatha Dé Danaan herri ausart eta aberatsaren etxea izan zen. Baina garai nahasi horietan beste herri bat iritsi zen Eireko itsasertzetara, Gael-eko herri zelta. Bataila latz baten ondoren, iritsi berriak garaile suertatu ziren, eta geroztik Gael-eko herria Eiren dirau, nahiz eta izena ematen dion hizkuntza azkenekotan egon…
Beraz, Dé Danaan jendeak agintea galdu zuen, baina lurraldetik ihes egin beharrean bertan gelditzea erabaki zuten, errealitateko beste eremu batean nolabait ezkutaturik bezala. Gaur egun, iratxo, maitagarri eta lamien herriaren izenez ezagunago zaizkigu.
Oso gustukoa dut lagunekin mendira abiatzea, naturak eskaintzen digun edertasunaren ikuskizuna partekatzera. Hala ere sarritan aurkitzen dut nire burua bakardadean baso eta zelaiak zeharkatzen. Bizipena zeharo ezberdina izan ohi da. Zenbaitetan, asmoa, kontzientzia eta egotea behar bezalakoak direnean, gure artean oraindik dauden baina oro har ikusiezinak diren izaki horietako baten batekin topatu zaitezke. Begirada hain desberdinen gurutzatze horiek une magikoak dira, intentsitatez jositako aurkikuntzak. Bereziturik bizi ohi diren bi mundu paraleloen artean zirrikitua zabalduko balitz antzera. Gurea baino zaharrago, basatiago, sakonago eta agian libreago den mundu batera zabaltzen den zirrikitua.
Mario lagunak hitzaldi batean esan zuen bezala, “Adarbakarrekoetan sinetsi beharra dago” Are gehiago, egon, badirela gehituko nuke neuk…"