Aiaraldea Komunikazio Leihoa ikuskizun bat prestatzen ari da abenduaren 14rako. Helburua bikoitza da: emakumeen ikusgarritasuna eta sortzaileen lanak artearen bidez oholtzaratzea eta eskualdeko arte espresioak euskarara biltzea.
Sortzaileei deia
Ekitaldia Amurrioko antzokian egingo dute eta protagonistak eskualdeko artistak izango dira. Hargatik, parte hartu nahi duen orori (dantzariak, raperoak, clownak, kultur taldeak, musikari eta kantariak, idazleak, margolariak eskultoreak...) urriaren 21 baino lehen harremanak@aiaraldea.com helbidera idazteko dei egin diote.
Era honetan eskualdeko kultur taldeekin harremanak euskaraz sustatzea lortu nahi dute: "Gure elkartearen filosofia izanik euskararen herrian bizi diren Aiaraldeko espresio eta arte-adierazpen mota guztiak taularatu nahi ditugu: genero, adin, kolore, jatorri, ideologia eta sentsibilizazio ezberdineko jasotzaileak bildu eta elkarrekin euskaraz gozatzeko aukera sortu".
