JON LARRINAGA (Lezama, 1991) GSC Blagnac talde frantziarrean arituko da datorren urtean, Euskadi Fundazioaren taldean egon eta gero.
Nondik iritsi zitzaizun Frantziara joatearen eskaintza?
Entrenatzaileak e-posta bat bidali zidan hurrengo urterako nirekin kontatu nahi zuela esanaz. Jarraian Donostian elkartu ginen eta kontratua zehaztu genuen, urtebeterako hasiera batean, ikusiko dugu ostean.
GSC Balgnac taldearen parte izanda, beraz, Frantziara joan beharko zinateke entrenatzera...
Ez, bertara lasterketetan parte hartzeko joango naiz soilik, gainontzekoa orain arte bezala egiten jarraituko dut, etxean entrenatzen, noski.
“Fitxaketa onak daude, eta guztion artean talde lehiakorra osatuko dugulakoan nago”
Zer nolako itxura dauka denboraldiak talde berri baten parte izanda?
Fitxaketa onak egin dituzte, horietako zenbait ezagutzen ditut, eta guztion artean talde lehiakorra egingo dugula uste dut. Xederik eta garrantzitsuena Frantziako Kopa izango da, gainontzeko itzuliak orain arte egin ditudanen ia berberak izango diren tartean.
Zein izango da zure helburu pertsonala denboraldi berrirako?
Uste dut Frantziako lasterketak orokorrean nire egoera fisikorako egokiak direla; ez baitituzte portu handiko guneak, adibidez. Orokorrean maila ona ematea eta erakusleiho bikaina den aukera honi probetxua ateratzea dut xede.
“Xederik garrantzitsuena frantziako kopa izango da”
Tarteko pausu bezala ikusten duzu beraz GSC Blagnac-en egotea?
Afizionatuetan Espainia mailan oso aukera gutxi daude eta zer esanik ez Euskal Herrian. Niretzako apostua izan da Frantziara salto egitea eta momentuz aukera polit honetan sartuko naiz buru-belarri.
Entrenamendu pertsonalak aldatuko al dituzu?
Berdin entrenatzen jarraituko dut, iazko denboraldirako bezalaxe.
Oso ezberdinak al dira hemengo, Aiaraldeko, eta topatuko dituzun Frantziako aldapak?
Ez, azken finean ingurua antzekoa da eta, esan bezala, ez dago aldapa handiegirik izango ditudan lasterketetan, baita lautadak ere, akaso gure ingurunean gutxien topatzen ditugunak. Antzeko lurraldea da, azken finean.