Aiaraldea Komunikazio Leihoak antolatzen duen udako argazki postalen lehiaketak baditu irabazleak. Ostiralean elkartu ziren epaileak, literaturaturan eta argazkigintzan aditu eta zaleak diren aiaraldearrak. Aurtengoa bosgarren edizioa izan da eta bost kategoria izan ditu: selfiena, umorearena, jaietakoa, Euskal Herria edo atzerrikoa eta Aiaraldekoa.
Irabazleak
Selfirik onenaren saria Aimar Gutierrezen argazkiari eman diote, bigarren onena Edorta Morenoizan delarik. Umorearen kategorian Ruben Ibañez eta Peru nagusitu dira, hurrenez hurren. Festetako irudirik onena Zuriñe Alavak erretratatutakoa izan da, eta bigarrena Jon Katalanek aurkeztutako lana. Euskal Herriko edo atzerriko argazki-postal sarituak, berriz, Alfredo Remirez eta Ainara Berrocalenak izan dira. Eskualde mailan, ordea, @Kuiker eta Joxe Blanco izan dira sarituak. Sari banaketa ostiral honetan egingo da, 19:00etan Laudioko Museo Gastronomikoan. Irabazleek eskualdeko nekazal-etxe batean bi lagunek gau eta gosariaz gozatzeko aukera lortuko dute, eta bigarren geratu direnek aiaraldeko jatetxeetan bi lagunentzako otordua. Horretaz gain, haien argazkiaren kuadroa eramango dute. Postal sarituen argazki bilduma ikusgai egongo da webgune honetan.