Gorobelgo zonalde azterketa sakon bat egiten duen liburu bat argitaratu berri du Salbagoro elkarteak: “Artzaintza Gorobel mendilerroan”. Izenagatik artzaintzaren inguruan soilik mintzatzen den liburua dela dirudi, baina Salbagoroko kideek azaldu dute argitalpenak mendilerroaren inguruko beste hainbat alde ere jorratzen dituela.
Testua sei ataletan banatua dago. Lehen zatiak mendilerroaren deskribapen orokor bat egiten du. Bigarrenak, berriz, arkeologia du hizpide: mendilerroan topatu daitezkeen trikuharri, zulo edo aintzinako herrixken arrastoen inbentario bat jasotzen du. Hurrengo hiru atalek artzaintzak zonaldean izan duen eragina aztertzen dute eta, bukatzeko, seigarren kapituluak aztertutako guztiaren gaineko ondorioak azaltzen ditu.
Hainbat lekutan eskura
Liburua irailaren 21ean Amurrion egingo den XII. Artzain egunean jarriko dute salgai, 25 euroren truke. Maroñoko Guzurtegi jatetxean, Amurrioko kiosko eta liburu dendetan edota Artziniegako museo etnografikoan ere egongo da eskura edo, asalvagoro@gmail.com posta elektronikoaren bidez ere eskatu daiteke.