Aurtengo San Roke jaien balorazioa egin du Laudioko Udalak. Balorazio positiboa izan da udal-gobernu taldeko kideek egin dutena, eta herriko elkarte eta taldeei egindako lana eskertu diete.
Hala ere, jaien bi zatien artean ezberdintasunak egon direla azpimarratu du Fontso Larrazabal kultur zinegotziak. Lehen zatian egun makalak egon diren bitartean, bigarren zatian jaiak indartu egin dira, zinegotziaren hitzetan.
Aurten ohikoa baino luzeagoa izan da jaiaren bi zatien arteko tartea, bederatzi egunekoa izan baita. Jaien tartearen inguruko eztabaida eman behar dela aitortu dute udal-gobernuko kideek, baina horretarako foroa batzorde paritarioa izan beharko litzatekeela gaineratu dute. Hala, batzorde paritarioa berriz martxan jartzeko apustua egingo dutela aurreratu dute zinegotziek, eta azaldu dute aurtengo jaiak antolatzeko bilerak egin dituztela hostalari zein elkarteekin.
Jaien bi zatien inguruko eztabaidari jarraiki, Koldo Zabala zinegotziak gogorarazi du 2011an inkesta bat egin zela herritarrei gaiaren inguruan galdetuaz. “Oso parte hartze gutxi egon zen, 200 pertsona inguru, eta gehienak jaien datak ez aldatzearen alde azaldu ziren”. Hortaz gain, beste faktore batzuk kontuan eduki behar direla gaineratu du Zabalak. Izan ere, aurten Bilboko jaiekin ez zapaltzeak jaien bigarren zatia “indartu” egin du, zinegotziaren arabera.
Orozko eta Okondon
Orozko eta Okondon egin dituzten bertako jaien balorazioa. Orozkoko kultur zinegotzia den Begoñe Olabarriak positiboki baloratu ditu iragan igandean bukatu ziren San Antolin jaiak. “Jende asko” bertaratu denaren sentsazioa dutela azaldu du zinegotziak, “umeen egunean eta igandean, batez ere”. Bus zerbitzuaren arrakasta ere azpimarratu du Olabarriak, bataz beste 41 pertsona joan baitira bidaia bakoitzean. Gainera, bi bus gehiago jarri behar izan zituzten, zeuden zazpiez gain.
Okondoko Jai Batzordeak, bere aldetik, San Bartolomeko jaien balorazio “nahiko ona” egin du. Arazoren bat edo beste egon dela azaldu dute, Jai batzordeak antolatzen duen lehen aldia izan delako. Baina herrian dagoen zentzazioa orokorrean ona dela uste dute batzordeko kideek.