Amurrion eta Luiaondon egingo diren anbulatorioen proiektuek urrats garrantzitsuak eman dituzte. Eusko Jaurlaritzak Amurrioko osasun-zentroaren proiektuaren erredakzioa egiteko esleipena iragarri du uztailaren 4an, Euskal Herriko Agintaritzaren Aldizkariaren bitartez. Beraz, enpresek haien proposamenak aurkeztu ditzakete dagoeneko. Oinarrizko aurrekontua 206.473,58 eurokoa -BEZik gabe- da.
Bestalde, Aiarako Udal Osoko Bilkurak onartu du uztailean Luiaondon egingo den anbulatorioaren proiektua. Berez, udalbatzak onartu zuen hasierako proiektua eta beste arkitekto batek -lanen zuzendaritza eramango duenak- egindako berrikustea. Talde politiko guztiek, Aiara Batuz ezik, babestu dute.
Printzipioz, Aiarako Udalak uste zuen Arabako Foru Aldundiak berehala aztertuko zuela proiektua -2013-2015 Foru Planen barruan dago ekimena- eta irailean esleipena egiteko aukera izango zutela.
Hala ere, azterketa egin behar duen teknikariak oporrak hartu ditu eta irailean gutxienez ekingo dio lanari.
Josu Artetxe alkateak adierazi du ahalik eta lasterren zabaldu nahi dutela esleipena, Foru Planaren arabera 300.000 euro inbertitu behar baituzte 2014an.