Arabako Foru Aldundiak lurraldeko garraio-plan berria lantzen ari da, zirriborroari helegiteak aurkezteko aukera zabalduz. Aiarako Alderdi Popularrak adierazi duenez, garraioa, orain arte heldu ez den lekuetara zabalduko da, maiztasunak txikituz eta bidaien denbora murriztuz.
Plan berriarekin ezadostasuna adieraziz, Artziniega eta Amurrioko alkateek, Agurtzane Llano eta Josune Irabien, helegiteak aurkeztu dituzte eta Aldundiara hurbildu ziren hauen zergatia azaltzera. Haien aburuz, De Andresek gidatzen duen gobernuak aurkeztu duen planak ez du oraingoa hobetuko, horregatik, Artziniega eta Amurrioko erabiltzaileen kezkak bideratu dituzte helegiteetan.
Amurrion ikasten duten bigarren hezkuntzako ordutegietara moldatzea proposatu du Agurtzane Llanok. Horrekin batera, bus aldaketen denbora murriztea eskatu du, erabiltzailea itxaroten ordu erdi baino gehiago egon ez dadin eta ibilgailuak herriaren beharretara tamaina aldetik egokitzea. Aldi berean, Araba, Bizkaia eta Gipuzkoako garraioak erabili ahal izateko txartela sortzea proposatu du Llanok, prezioen berrikuspena eginez.
Josune Irabienek, Gasteizko erdigunean dauden geralekuak mantentzea eskatu du, Larrinbe eta Lezamakoak mantenduz eta San José auzoan bat sortuz. Aldi berean, erabiltzaile kopuru handien daukaten autobusak indartzea proposatu du, langileetara egokitutako ordutegiaren zabalpenarekin batera. Irabienek, arazoa oinarritik datorrela uste du: “Zerbitzuaren beharrak zeintzuk diren galdetu ez den neurrian, proposamena Aldunditik bakarrik jaiotzen den ideia da, erabiltzaileek batu dezaketen hobekuntzak ezagutu gabe.”
Lurraldearen egoera eta hiriburuarekin dauden harremanak aztertzea beharrezkoa ikusten dute Amurrio eta Artziniegako alkateek, Aiaraldeko biztanleek Gasteizekin zerbitzu hobeagoa izan dezaten. Horregatik, Aldundiak zuzentzea espero dute testu bat aurkeztuz.