Udan zure argazki postalekin Aiaraldea bustitzeko prest? Aiaraldea Komunikazio Leihoak udako argazki postalen lehiaketa antolatu du. Aurtengoa bosgarren edizioa izango da, eta bost kategoria eta hamar sari izango ditu. Ekainaren 24tik irailaren 20a bitarte iraungo du txapelketak. Azaldu dutenez, argazkiak eta testuak osatzen duten osotasuna baloratuko du epaimahaiak.
Bost kategoria eta 10 sari
Aurtengo berrikuntza Selfie originalenarena da, hots, pertsonen erretratuena. Gainontzekoan, lau kategoria hauek sarituko ditu epaimahaiak: Aiaraldea eskualdeko argazki-postal onena, atzerrikoa, jaietakoa eta postalik umoretsuena. Kategoria bakoitzean bi sari egongo dira. Lehenengoari nekazal etxe batean bi pertsonentzako egonaldia emango zaio, gosaria barne. Bigarrenari, eskualdeko jatetxe batean bi lagunentzako asteburuko otordua. Irabazleek Artiñano etxea (Orozko), Guzurtegi (Maroño) , Patxikoren etxea (Orozko), Zelaikoetxe (Ozeka) eta Etxegorri (Orozko) nekazal etxeak ezagutzeko tartea izango dute. Bigarren postua lortzen dutenek, berriz, Beldui txakolindegian (Laudio), Bordatxo tabernan (Amurrion), Bideko jatetxean (Amurrio), Balintxarreketan (Laudio) eta Hordagon (Baranbio) bazkari edo afari bat egitekoa.
Parte hartzeko hiru modu
Parte hartzeko hiru modu eskainiko dituzte. Batetik, udakoargazkiak2014.aiaraldea.com webgunera argazkia igotzea. Bestetik, Whatsappp edo Telegram mugikor aplikazioen bidez argazkia eta mezua bidaltzea. Horretarako, 688 848 152 telefono zenbakia erabiliko dute. Horretaz, twitterren @aiaraldea eta #eginklik hastag-a aipatuz parte hartzeko aukera ere eskainiko dute.
Webgune berezia
Lehiaketaren jarraipena egiteko udakoargazkiak2014.aiaraldea.com webgune berezia atondu dute. Bertan, jasotako argazki postal guztiak argitaratuko dituzte. Bisitariek postalak bozkatu edo komentatzeko parada ere izango dute.
