Aiaraldean zehar bisitatzeko hainbat leku daude. Hona hemen adibide batzuk:
KOBAK: Aretxarroko haitzuloa
Ugalde eta Okondo artean kokatzen den kobazuloa da Aretxarrokoa. J.M Barandiaran antropologoak neolitoko gizakien hilobi-arrastoak topatu zituen bertan.
Beste kobazulo batzuk: Supelegor (Itxinan), Kurtiberanos (Menoion), San Miguel El Viejo, Obikolako kobak (Laudioko Ermutik), Cueva Llana eta Curtiveranos (Gorobel), Peregaña...
PUTZUAK, UR JAUZIAK...: Urduña erreka
Tertangatik fraile bururako bidea hartuta, Urduña ibaian putzu eder bat dagoela azaldu dute Txarlazo mendi-taldeko kideek, baina gaineratu dute ura hotz samar egon ohi dela.
Beste putzu eta ur-jauzi batzuk: Peñalabroseko ur-jauzi eta putzua (Burgosen dago baina Añesetik iristen da), Aldabide (Itxina), Baranbioko erreka, Orozkoko ibaia (Usabeletik gora), Pozo Lagoseko urmaelak (Soxotik)...
IBILBIDEAK...: Gaztainaren ibilbidea (Orozko)
Gaztainarena seinalizazioa duen 7-8 kilometro inguruko ibilbide zirkularra da, Orozkon hasi eta Orozkon bukatzen dena. Ondare etnografikoaren hainbat adibide ikusi daitezke ibilbidean zehar.
Ibilbide gehiago: Soxo-Pozo lagos, Artziniegako dorrea-Lantenokoa, Lendoñobeitiko dorretxea-zubiak-errota, Amurrioko Orue auzotik Bañuetara...
ONDARE HISTORIKOA: Negorta dorretxea (Zuhatza)
Dorretxeek paper berezia jokatzen dute Aiaraldeko ondare historikoaren osakeran. Zuhatzakoaz gain, Aiaran soilik beste bost daude. Artziniegan, Orozkon, Laudion, Lantenon... ere topatu daitezke.
Ondare historiko gehiago: Karlisten mahaia (Urduña), Artza errota (Olabezar), Mendietako dorrea...
HERRIGUNEAK: Añes, Artziniega, Orozko...
Herrigune eder asko dago eskualdean. Aketza Merino historialari amurrioarrak Añes bisitatzeko gomendio luzatu digu, herriak oraindik erdi-aroko estruktura bera mantentzen duelako.
Beste herri batzuk: Retes de Tudelako alde historikoa, Mendieta herria (Artziniegan, Erdi Aroko dorrea edo Balmasedako errege-bidea.
AKANPATZEKO LEKUAK:
Kanpaldi librearen gaineko legeak hala dio:
Gehienez hiru egun egon daiteke leku berean kanpaturik, kanpin hurbilenetik 2 kilometroko distantzia mantendu behar da, hiru kanpin-denda jartzea gehienez, eta beste edozein akanpalekurekiko kilometro bateko erradioa izatea. 10 pertsona egon daitezke gehienez, eta baimendua egon behar da bertan kanpatzea.