Naturayala blogak hurbileko espezie eta bioaniztasunaren inguruan beste sarrera interesgarria argitaratu du, Gustavo Abascalek idatzi du testua:
"Nagusienek gogoan izango duten moduan, ur-arratoia (Arvicola sapidus), urtxintxa, kirikino, birigarro eta beste hainbat basapiztiekin batera, herriko gastronomiaren parte zen eta eskualdeko ibaietan harrapatzea erraza zen, Nerbio ibaian esaterako, Amurrioko Ugarte auzotik pasatzen den lekuan.
1985ean argitaratu zen Araba, Bizkaia eta Gipuzkoako Ornodun Kontinentalen Atlasak oroitzapen hau konfirmatzen du; Aiaran, Arrastarian, Urduñan eta Laudion espezie honen presentziaren lekukoak jasotzen baititu. Halarik ere, gutxi izango ziren, kantauriar zonaldeak ez baitizkio animalia honi bizitzeko egoera hoberenak eskaintzen, hala nola, gordelekuak egiten dituzten ibaien etzaleku bigunak.
Espeziearen gainbehera orokortuak sortutako kezkaren ondorioz, 2011an Euskadin ur-arratoiaren ikerketa egin zuen Eusko Jaurlaritzak, Ihoberen eta SECEM-aren bitartez eta honako hau ondorioztatu zuen; 1985.urteko atlasarekin alderatuz, banaketan atzerakada egon zela eta Arabako Kantauriar eskualdean ez zegoela espezie honen presentziarik.
Habitatak kalitatea galdu izana izan daiteke egoera honen arrazoia, baita ere zaila izaten dela animalia hau ezkutatzen den urmaeletan zein erreka txikietan aurkitzea.
Hala ere, martxoan Urkabustaiz inguruko bi urmaeletan, hain zuzen ere, topatu zituen Mariok ur-arratoiaren hainbat aztarna, hala nola, landaredian sortzen dituen galeriak eta gorotzak. Modu honetan, WN0006 laukian ur-arratoien presentzia konfirmatu egin da, aipatu ikerketak ezezko emaitza ematen bazuen ere."