ASASAM elkarteak osasun mentalaren esparruan lan egiten du, formalki, duela 25 urte. 1989an jaio zen legalki -nahiz eta 1985ean hasi zuten bere jarduera- eta dagoeneko 190 bazkide ditu.
Urteurrena ospatzeko prentsaurrekoa eman du ASASAM-ek. Elkarteko lehendakaria Maria Angeles Arbaizagoitia, Gurutze Villanueva langilea eta Maria Isabel Garcia erabiltzailea ez ezik, erakundeen ordezkari ugari ere egon dira ekitaldian, eskualdeko hainbat alkate eta tokiko zinegotzi-Natxo Urkixo, Josune Irabien, Sergio Tato eta Josu San Pedro, besteak beste-, Eusko Jaurlaritzaren koordinatzaile sozio-sanitarioa Jose Antonio de la Rica eta Arabako Foru Aldundiko zerbitzu sozialen arduraduna Paloma Aranceta.
Guztiek goraipatu dute ASASAM-ek egindako lana ez bakarrik gaixotasun mental larriak pairatzen dituzten pertsonei zerbitzuak eta laguntza ematen dietelako. Gaixotasun mentalen inguruan dauden estereotipoak ezabatzeko egindako ibilbidea ere azpimarratu dute.
Elkarteak, bestalde, gogoratu du hiru esparrutan lan egiten duela: gaixoekin -babesa emateko eta bere autonomia lantzeko-, bere senideekin -laguntza eskaintzeko- eta komunitatearekin -gaixoen gizarteratzea sustatzeko-.
Bitarteko berriak
Urteurrena ospatzeko tresna berriak eskainiko ditu ASASAM-ek. Maria Angeles Arbaizagoitia lehendakariak adierazi du 120 pertsona laguntzen dituztela, baina jende gehiago dagoela eskualdean arazoei aurre egin behar diena. Horiei heltzeko eta haien zerbitzuak eskaintzeko bitarteko berriak erabiliko dituzte.
Kanpaina
ASASAM-ek “elkarrekin hobea da bizitza” kanpaina abiatuko du. Bere helburu garrantzitsuena da osasun mental arazoei aurre egiteko laguntza behar dela adieraztea. “Hobeto sentitzeko beharrezkoa da babesak bilatzea” azaldu du elkarteak. Horretarako kolektiboaren irudi normalizatua behar dela uste du.
Mezuaren zabalpenerako ASASAM-ek webgunea eta irudi korporatiboa berritu du eta gainera argazki lehiaketa antolatuko du osasun mentalarekin loturiko egoerak islatzen dituzten argazkien bila: senide eta gizartearen babesa, umorea, kirola, aisialdia...
Bestalde, 25 urte horietan lagundu dutenei omenaldia egin nahi die ASASAM-ek eta ekitaldiak gauzatuko dituzte zentzu horretan.
Erakundeekin elkarlana
ASASAM-ek hainbat erakunde publikorekin harremana garatu du gaixoen gizarteratzea bultzatzeko eta horren adibidea da Amurrioko Udalak zabaldu duen ekimena. Elkartearen zenbait erabiltzailek landareak hazten dituzte zentro-okupazionalean eta landare horiek erabiliko ditu Udalak lorategietan jartzeko.