Astero bezala, aste-bukaerarekin batera zinema heltzen da gure eskualdera eta gure herrietara. Herri guztietan zinema emanaldiak ez badira ere, aste honetan bi herrik baieztatu dituzte emanaldiak: Amurrio eta Laudio.
Rush
Laudion, larunbatean, apirilak 12, Lanbide Heziketa Eskolan arratsaldeko 17:30tan eta 20:00tan, azken Urrezko Globoetan drama onenaren eta aktore onenaren mailetan izendapenak lortu zituen ekoizpen interesgarri bat: Rush. Ron Howard zuzendariaren azken lan honek, Daniel Brühl eta Chris Hemsworth aktoreak ditu protagonistak, 70ko hamarkadan Formula 1 lasterketetan Nikki Lauda eta James Hunt pilotuk zuten lehiak protagonistak izanik. Bikain zuzendutako filma honek, F1-aren barrenetan murgilduko gaitu, hain ezberdinak ziren bi munduko txapeldun hauen arteko harremana eta borroken isla bikain batean bilakatuz.
No more Tour
Laudion ere, baina igandean, apirilak 13, Lanbide Heziketa Eskolan, ere, arratsaldeko 18:30tan euskal zinema ikusgai; No more Tour. Fermin Muguruza musikariaren azken dokumentala ikusgai, bere azken kontzertu bira protagonista delarik. Euskal zinemaz eta musikaz gozatzeko aukera bikaina... dohainik gainera!
Agosto
Zinema emanaldiak dituen bigarren herria Amurrio da. Igandean, apirilak 13, 19:30tan, eta astelehenean, apirilak 14an, 20:00tan, eta beti bezala Amurrioko Antzokian, Estatu Batuetan urte askotan zehar arrakastatsua izan zen antzerki baten zinemarako moldaketa ikusgai: Agosto. John Wells zuzendari lanetan, eta Meryl Streep eta Julia Roberts protagonista dituen filma honek, Estatu Batuetako familia baten barne arazoetan murgilduko gaitu, ama eta alaba batzuen arteko borrokan amaigabean. Aktore lanak zoragarriak dira guztiz, Oscar sarietan eta Urrezko Globoetan izendapenak lortu zituen ekoizpen gomendagarri honetan.
Astero bezala, zinemaren magiaz gozatzeko aukera bikainak gure eskualdean!
Fitxa teknikoak
Rush
Zuzendaria: Ron Howard
Gidoilaria: Peter Morgan
Aktoreak: Daniel Brühl, Chris Hemsworth, Olivia Wilde...
AEB, 2013. 123 minutu.
No More Tour
Zuzendaria: Daniel Gómez eta Fermin Muguruza
Gidoilaria: Daniel Gómez, Fermin Muguruza eta Lara Cano
Aktoreak: Fermin Muguruza, Xabier Solano, Amaia Apaolaza...
Euskal Herria, 2013. 103 minutu.
Agosto
Zuzendaria: John Wells
Gidoilaria: Tracy Letts
Aktoreak: Meryl Streep, Dermot Mulroney, Julia Roberts...
AEB, 2013. 121 minutu.