Aiara Batuz, Okondo Bai, eta EAJren babesarekin onartu du Aiarako Koadrilak 2014ko aurrekontua. Laudioko Udaletxean egin zuten bilkura eskualdeko talde politikoek. Omnia, PSE-EE eta PP alderdiek aurka bozkatu zuten, kasu batzuetan gardentasun falta argudiatuz. Bildu, aldiz, abstenitu zen eta aurrekontuak prestatzeko denbora nahiko ez izatea salatu zuen.
Diru kopuruak
Koadrilak 2.918.747,13 euroko aurrekontua izango du aurten. Zati handiena -1.678.181,41 euro- ingurumen sailak erabiliko du, zaborraren kudeaketa baitagokio erakundeari Okondo, Laudion, Amurrion, Aiaran eta Artziniegan. Zentzu horretan, programa aitzindaria abiatuko du gai organikoa jasotzeko. Gainera, edukiontziei segurtasun ekipamendua jarriko diete, haizeak bota eta eraman ez ditzan. Bukatzeko, zarataren mapa prestatuko dute.
Gastu arruntak -hau da, langileak- 262.289, 06 euroko saila izango du, Euskarak 63.511,12 eurokoa, Fitxategi Aholkularitza zerbitzuak 32.538 eurokoa, Hirigintza Aholkularitzak 152.759,35 eurokoa eta Turismo Sustapenak -hau da, Aiaratur-, 74.203,57 eurokoa.
Sustapen ekonomikoaren esparrura 540.048,90 euro bideratuko dituzte Koadrilaren bitartez. Horrekin enplegu programa kudeatuko dute eta finantzazioaren aldetik, Lanbidek 390.000 euroko ekarpena egingo du eta gainontzekoa Koadrilak berak jarriko du. Gainera, Okondon eta Aiaran 4.000 euro izango dituzte tokiko ekoizleen jarduera bultzatzeko eta hori gauzatzeko eredua zehazteke dago oraindik.