Aiarako Ikasle Abertzaleak gazte erakundeak grebaren balorazio positiboa egin du. Jarraipena zabala izan dela diote grebalariek eta LOMCE-ren aurka duten jarrera plazaratu dutela uste dute.
Protestak goizeko 09:00etan hasi dira Amurrion eta Laudion. Zaraobe Institutua eta Aresketa Ikastola ixtea lortu dute piketeek Amurrion.
Laudion ere jarraipena arrakastatsua izan da Ikasle Abertzaleak-en ustez. Institutuan DBHko 1. eta 2. mailako ikasleak bakarrik agertu dira ikastetxean, greba eskubidea ez baitute. Gainerakoek greba egin dute.
Laudio Ikastolan 3 klasetan zeuden hainbat ikasle atxikitu dira eta Lanbide Heziketa Udal Eskolan bost ikasle besterik ez dira agertu goizean.
Ikastetxetara jo ostean Amurrioko piketeek pankarta bat jarri dute PPren egoitzan. Laudion mahai-ingurua antolatu dute Lamuza Plaza.
Manifestazioa
Eskualdeko mobilizazioa 12:00etan hasi da Laudion eta 150 pertsonek parte hartu dute. Manifestazioa bukatu denean hainbat gaztek PPren egoitzaren aurrean eserialdia hasi dute errepidea moztuz. Handik gutxira Ertzaintza agertu da eta 4 gazte atxilotu ditu manifestarien artean. Bestalde, bertan zeuden bi kazetariei ere nortasun agiriak eskatu dizkie.
Poliziak adierazi die 4 manifestariei isuna jasoko dutela trafikoa oztopatzeagatik. Tentsio une gutxi bizi izan dira eta identifikatuak aske utzi eta gero mobilizazioa bukatutzat eman dute.