Osakidetzak Nerbioi Garaian ginekologia zerbitzua indartu behar duela nabarmendu du berriro Eva Blanco amurrioarrak, EH Bilduren izenean, Eusko Legebiltzarrean.
Ez da erakunde horretan aldarrikapena entzuten den lehen aldia. Pasa den urtean, martxoan hain zuzen ere, EH Bildu eta PSE-EE alderdiek eskaera bera egin zioten euskal osasun zerbitzu publikoari.
20.000 emakume baino gehiago
Eva Blancok gogoratu du 21.294 emakumeen beharrak asetzeko ginekologo bakarra eta hiru emagin daudela eskualdean. Horregatik, beste ginekologo bat kontratatzea eskatu dio Osakidetzari.
Egungo langile kopurua dela eta itxaron-zerrenda oso luzea dela adierazi du Eva Blancok. 4 eta 6 hilabeteen artean itxaron behar dute pazienteek ginekologia arreta izateko.
Horren ondorioz, “emakume askok kontsulta pribatuetara jo behar izaten dute, Osakidetzak ez dielako arreta bermatzen”, esan du EH Bilduko legebiltzarkideak.
Txaro Sarasua sozialistak azpimarratu du eskualdeko emakumeen artean %25 baino gutxiagok jasotzen dutela ginekologia zerbitzua. Proposamenak aurrera egin du EH Bildu eta Euskal Sozialisten aldeko bozekin, gainerako taldeak abstenitu dira.
Eusko Jaurlaritzak ezezkoa eman du
Hala ere, Osasun Sailaren arduradunak adierazi du ez duela zerbitzua indartuko, Sailburuaren aburuz ematen den ginekologia zerbitzua aproposa baita. EH Bildu eta PSE-EEk ordea, uste dute datuekin jolasten daudela Eusko Jaurlaritzatik.
“Egia da urtero emakume gutxiago jasotzen dutela zerbitzua -4.900 2011n, 4.100 2012an eta 3900 2013an- baina horren arrazoia da gero eta jende gehiagok esparru pribatuetara jotzen duela” azaldu du Txaro Sarasuak.
Eva Blancok, bestalde, azpimarratu du emaginek gero eta ardura gehiago hartzen dituztela bere gain eta horrela estatistikak faltsutzen direla. Emaginek 11.230 paziente izan zituzten 2011n, 12.155 2012an eta 12.900 inguru 2013an.
EH Bilduko legebiltzarkideak esan du haserre dagoela, EAJko arduradunak bozketa egin baino lehen ziurtatu baitio ez dela aurrerapausorik emango esparru horretan.
Gauzak horrela, ekimen gehiago aurkeztuko dituztela iragarri du Eva Blancok. Ibilbide luzea egin du aldarrikapenak Eusko Legebiltzarrean. 2006. urtean sozialistek egin zuten eskaera, hurrengo urtean popularrek, 2010ean jeltzaleek eta 2013an, EH Bildu eta PSE-EEk.