Eskubide Sozialen Karta aurkeztu eta eztabaidatzeko hitzorduak zabaldu dituzte eskualdeko eragile sozial eta sindikalek. Hiru gune desberdinetan egingo da eztabaida, modu irekian eta herrien arabera banatuak.
Bi egunetan zatituko da prozesua: lehena martxoaren 15ean eta bigarrena 29an. Denak goizeko 10:00etan izango dira. Guneei dagokionez, Aiara Herri, Amurrio eta Artziniega azken honen udaletxe zaharrean bilduko dira lehenengo egunean.
Bigarrenean, aldiz, Amurrioko kultur etxean dute hitzordua. Urduñako kultur etxean arrastariarrak eta urduñarrak berauek bilduko dira eta Laudiokoan, berriz, laudioarrekin batera okondo eta orozkoarrak izango dira.
Kartaren hitzaurrea, printzipioak eta eztabaidarako gaiak Amurrio, Laudio eta Urduñako kultur etxean, Aiara Herri eta Orozkoko udaletxean eta Artziniegako liburutegian eskura daitezke. Euskal Herriko Eskubide Sozialen Karta egoera ekonomikoaren ondorioz eta berari erantzuteko jaiotako ekinbidea da.
“Botere finantzarioek eta elite politikoek eragindako krisia” herritarrei ordainarazi nahi izatea bidegabekeriatzat hartuta, horren aurrean hartu beharreko neurriak eta proiektuak aurkeztea du xede, parte hartze prozesu eta eztabaida bidez zehaztuko direnak. Egoera eraldatzeko tresna gisa aurkezten da karta, aldaketa egitasmo komun baten inguruan indarrak bildu eta sareak ehuntzeko beharra azpimarratuz.