Hainbat ekimen dituzte prestatuak Aiaraldeko Gazte eta Ikasle eragileek datozen asteetarako. Ikasle Abertzaleak eta Ernai erakundeek eskualde mailako planteamenduak aurkeztu dituzte. Gazte Asanbladek, berriz, herri mailako ekimenak egingo dituzte.
Ikasle Abertzaleak, grebara
Ikasle Abertzaleak antolakundeak “mobilizazio egoera iraunkorra” deitu du, Espainiako Gobernuak hezkuntzan darabilen politikaren aurrean (LOMCE legea) Euskal Eskola Nazionala aldarrikatzeko. Horretarako hainbat mobilizazio egingo dituzte eskualdeko ikasle abertzaleek. Datorren ostegunean, martxoak 13, kontzentrazioa egingo dute Laudioko Herriko Plazan, 12:00etan; eta jarraian ekintza bat egingo dute.
Hurrengo egunean, martxoaren 14an, Amurrioko ikasleei pasako diete lekukoa. 11:30etan kontzentrazioa egingo dute Herriko Plazan; eta burrunbada egingo dute gero, kaleetan zehar. Baina ikasle abertzaleak ez dira bi mobilizazio horietara mugatuko: hurrengo astean zehar asanblada informatiboak egingo dituzte ikastetxeetan, 27rako deitua dagoen ikasle greba orokorrari begira. 20an "borroka eguna" egingo dute gainera.
Ernai, burujabetzaren bila
Ernai gazte antolakundeak, bere aldetik, prekarietatearen gaia lantzeari ekin dio. “Izan ere, Aiaraldea Hego Euskal Herriko eskualde kaltetuenetako bat da langabeziari dagokionean, eta are gehiago gazteak garen heinean, ezinezkoa baitzaigu gure bizi-eredua askatasunez eraikitzea”, adierazi dute Ernai Aiaraldeko kideek.
Hala, hainbat gaien inguruko formazio saioak antolatu dituzte. Iragan martxoaren 7an abortuaren aurkako legearen inguruko hitzaldia antolatu zuten Laudioko Gure Aukera elkartean. Emaion talde feministako kideak aritu ziren bertan hizlari. Datorren martxoaren 21rako, aldiz, eztabaida bat antolatu dute, 18:00etan Orozkoko Gaztetxean izango dena, “Ikasle mugimenduaren matxinada!” izenburupean. Apirilaren 11an desobedientzia jorratuko dute, 18:30etan Urduñako Kultur Etxean egingo duten hitzaldian. Apirilaren 25rako, berriz, agroekologiari buruzko mahai-ingurua dute prestatua, 18:00etan Amurrioko Kultur Etxean izango dena. Azken formazio saioa maiatzaren 2an izango da, 18:00etan Arespalditzako Udaletxean. LAB sindikatuko kideek Nuestro mayo rojo liburua aurkeztuko dute bertan.
Ernai Aiaraldeko kideek azaldu dute egin dute planteamendua “burugabe-burujabe” dinamika nazionalarekin “lotura estua” duela, eta eskualdean prekarietateak duen eraginaren inguruko bideo-erreportai bat egiteko asmoa ere dutela aurreratu dute.
Amurrion, lokalaren proiektua aurkeztear
Amurrioko Udalak San Joseko kuartel zaharrean espazio bat eskaini zion Gazte Asanbladari, eta honek proiektu bat garatu du espazio horretan oinarritua. Martxoaren 14an bizikleta martxa egingo dute kuartel zaharreraino, 17:00etan, Herriko Plazatik abiatuta. Bertara iristean talde-argazkia egingo dute eta, ondoren, askaria hartu eta triki-poteoan arituko dira.
Lokalaren proiektuaren aurkezpen publikorako, baina, 21erarte itxaron beharko da. Egun horretan egingo baitute, kuartel zaharrean bertan, 18:00etan.
Urduña, gazte egunaren zain
Apirilaren 5ean ospatuko du Urduñako Gazte Asanbladak 16. gazte eguna. Data hori iritsi baino lehen, baina, beste hainbat ekintza egingo dituzte. Datorren ostiralean, astero bezala, pintxo-potea egingo dute gaztetxean, eta Uluka talde akustikoak joko du, 21:30etan. Ostegunean, aldiz, hitzaldia egongo da gaztetxean, Venezuelako gatazkaren inguruan, Askapena Aiaraldeko kideen eskutik. Martxoaren 25ean, aldiz, gaztetxearen II. urteurrena ospatuko dute.
Hortaz gain, sagardotegira irteera antolatu dute Gazte Asanbladako kideek, datorren larunbaterako. Buserako eta bazkarirako bonoak 40 euroren truke eskuratu daitezke Mugalde kultur elkartean.
Orozkoko Gaztetxea, berriz martxan
Udalarekin izandako gatazkaren ostean, martxan dago berriz Orozkoko Gaztetxea. Datorren ostiralean pintxo-potea egingo du bertan Gazte Asanbladak, 19:30etatik aurrera, Irlanda gai moduan hartuta. 21ean, berriz, “Hilean bariku bat!” proiektu musikalaren entsegu irekia egingo dute asanbladako kideek, ordu berean.
Laudioko Gazte eguna prestatzen
Laudioko Gaztetxean ere hainbat ekintza egingo dituzte datozen asteotan. Datorren ostegunean, martxoak 13, Gure Esku Dago ekimena jorratzen ari den herritar taldea bertaratuko da gaztetxera, 19:00etan, dinamikaren nondik norakoak azaltzeko.
Martxoaren 21ean, aldiz, kontzertuak egongo dira gaztetxean. RPG-7 (Vallekas), Garraxika (Gazteiz), Izate Faltsua (Amurrio) eta Luz de putas (Hodarribi) taldeek joko dute.
Hortaz gain, Laudioko Gazte Eguna prestatzeko bilera irekia deitu du Gazte Asanbladak datorren martxoaren 23rako. Gaztetxean bertan izango da zita, 17:00etan.