Gustavo Abascalek Naturaya proiektuaren blogean hontz zurien inguruko sarrera interesgarria argitaratu du:
"Baserrien, korten, estalpeen eta bestelako eraikinen zaharberritzeak hontz zuriek (Tyto alba) kumatzeko toki egokiak aurkitzea oztopatzen ari da, espezie honen beherakadaren arrazoi handienetariko bat bihurtuz. Gainera, ohikoa da baserrietan bizi direnek hontz zuriek kumatzeko erabiltzen dituzten zuloak estaltzea, hegaztiek gauen egiten dituzten zaratak ekiditeko.
2013 urtean eskualdeko biztanleei eta parrokoei esker, 14 elizetara sartzeko aukera izan nuen, beti ere, hontzen kumaldi garaia errespetatuz: Artziniega, Murga, Zuhatza, Menoio, Maroño, Izoria, Luiando, Urduña, Beotegi, Madaria, Arespalditza, Lezama, Baranbio eta Amurrioko elizetara hain zuzen ere.
Nahiz eta elizan zaharberritze obrak egin diren, toki hauek hontz zuriek kumatzeko leku egokienak izaten jarraitzen dute hainbat sarbide estali gabe utzi direlako. Izan ere, eliza hauetan guztietan aurkitu nituen kumatze aztarnak (arrautza zatiak, janari hondarrak, txiten gorpuak...).
Salbuespen bakarra, Amurrioko eliza izan da; bertako kanpandorrean sare bat jarri zen usoak ez sartzeko, baina honela hontzei ere kalte egin zaie. Parrokoaren oniritzia jaso ostean, gure helburua kabi-kutxa bat jartzea da hontz zuriak berriro ere toki honetara itzul daitezen."