Madrilen egiten ari den 35/02 Sumarioaren harira, hau da, Batasuna eta Herriko Tabernen epaiketan, Santi Hernando laudioarrari akusazioa erretiratu diote. Ez bakarrik fiskaltzak, AVT eta Dignidad y Justicia elkarteek ere horrela egin dute.
Horren ondorioz, epaileak akusazioa erretiratu dio. Santi Hernando eta Isa Mandiola bakarrik geratu dira egoera horretan. Fiskaltzak beste 7 inputatu gehiagori ere akusazioak erretiratzeko asmoa adierazi du baina AVT eta Dignidad y Justicia elkarteek ez dute neurriarekin bat egin.
Gainera, fiskalak gainerakoei zigor eskaerak jaitsi die.
Ibilbide luzea
2002an ireki zuen Baltasar Garzón epaileak 35/02 Sumarioa eta 2013ko urrian hasi zen epaiketa. 11 urte ziurgabetasunean murgildurik eman ditu Santi Hernandok.
Hori gutxi balitz, ia 6 hilabeteko epaiketa izan da Batasuna eta Herriko Tabernena. Horrek ahalegin ekonomiko eta pertsonal handia suposatu dio Hernandori. Madrilera joan dira maiz epaituak eta askotan egun batetik bestera aldatu dizkiete epaiketa egunak.
Libre ekimena
Epaiketa politiko hori eta beste batzuk salatzeko Euskal Herrian Libre Ekimena jarri da abian eta bere islada izan du eskualdean ere. Duela gutxi auto karabana eta ekitaldia antolatu zuten Aiaraldean 35/02 auzia salatzeko.