Torturaren Aurkako Taldeak Aiaraldean torturak utzi duen aztarna jasotzeko saiakera egin du. 1979. urtea hartu du abiapuntutzat. Taldeak adierazi du ez dela lan erraza, pertsona askok ez baitute torturaren inguruan hitz egin nahi.
Jasotako 70 kasu horien artean 10 bat pertsona inguruk behin baino gehiagotan torturatu dituztela nabarmendu dute. Torturatuen artean 35 atxilotuk gartzela zigorra ezberdinak izan dituzte -espetxealdi luzeak batzuetan eta beste batzuetan hilabeteak-.
Emakumezko zein gizonezkoek salatu dituzte torturak Aiaraldean. Gehienek Guardia Zibilaren eta Polizia Nazioalaren eskutik torturatuak izan direla aipatu dute, baina 1992tik aurrera Ertzaintzaren kontrako salaketak ere egin dira.
Polizia bakarra zigortuta tortura praktikatzeagatik
1986ko urtarrilaren 22an 8 laudioar atxilotu zituen Polizia Nazionalak. Gehienak 10 egun egon ziren inkomunikaturik eta torturak salatu zituzten. Bixente Malaxetxeberriak, "Baskito", ordea, egun bakarreko atxiloketa izan zuen.
Egun hori, hala ere, nahikoa izan zen poliziarentzat Bixenteri begibistako zauriak eragiteko: kolpeen ondorioz belarriak odoletan eta barrabilak ubelduta utzi zizkioten.
Poliziaren aurkako salaketa jarri zuen Bixentek eta epaiketa irabazi zuen. Gasteizko epaitegi batek Antonio José Rodríguez Cerdeiro polizia zigortu zuen. Hori bai, zigorra arina izan zen: bi hilabeteko atzipenaldi handia eta sei hilabeteko desgaikuntza ezarri zioten.
Torturak
Atxilotu gehienen lekukotasunek kolpe, umiliazio eta mehatxuei egiten diete erreferentzia, baina kasu batzuetan asfixia, elektrodoen erabilera eta beste teknika batzuk aipatu dituzte: enbudua, ebakuntza-gela, zintzilikatzea, postura behartuek objektuen bidez...
Gatazka politikoa
TAT-ek bildutako testigantzak gatazka politikoari lotuta daude. Beraz, beste arrazoiak direla eta torturak sufritu diren pertsonak badaude ez dituzte islatu egindako txostenean.