Lau izan dira azken hilabetetan diskoa edota maketa berriak argitaratu dituzten eskualdeko taldeak: Habemus papam, Hutsa, Mankaos eta Igor Arzuaga.
Alde batetik, Habemus Papam punk-oi talde amurrioarrak bere lehendabiziko maketa argitaratu zuen urrian, “Ekintza Zuzena” izenburukoa. Habemus Papam 2012. urtean Amurrion sortutako punk-oi boskotea da. Taldeak aurreko urrian argitaratu zuen bere lehen maketa, karga politiko handiko hamar kantek osatutakoa. Maketa taldeak berak autoekoiztutakoa da.
Bestalde, 2011. urtean sortutako Hutsa taldeak bere hirugarren diskoa argitaratu zuen azaroan, “astuh” izenburukoa eta zazpi kantek osatzen dutena. Eriz Perez gitarrista urduñarrak eta Balmasedako Maria Rivero abeslariak osatzen duten taldearen formatua guztiz akustikoa da, bere kantetan pop doinuak nabarmentzen direlarik. Bere hirugarren diskoaren ekoizpenari dagokionez, berriro ere Kike Moraren gidaritzapean grabatu du Hutsak diskoa, oraingoan taldeak Javi Palaciosen laguntza izan duelarik nahasketen arloan.
Igor Arzuagak eta Javi Cepedak, aldiz, “Bi” lana sareratu berri dute. Pianoa eta gitarra nahastuz, hamar kanta sortu dituzte. Lana, www.belearenhegoak.com webgunean entzun liteke.
Mankaos talde laudioarrak otsailean aurkeztuko du “Memoria de la procedencia” diskoa. Rock eta noise alternatiboa jorratzen dute. Duela 10 urte maketa bat atera zuten. Urte asko badaramatzate ere kaleratzen duten aurreneko lana da. Dena dela, abesti berriak sortzen ari direnez, bigarren disko bat ateratzea gustatuko litzaiekeela adierazi dute. Taldeari dagokionez, gehienak Laudiokoak dira. Grabaketa, diseinua eta sorkuntza beraiek egin dute. Datozen hilabeteetan diskoa aurkezteko kontzertuak emango dituzte.