Arabako Biltzar Nagusietan bozeramailea den Ramiro González jeltzaleak azaldu du gaur EAJ-k PPrekin aurrekontuen inguruan lortutako akordia. Zehazki, Ramiro Gonzálezek argitu du Aiaraldeko tokiko erakundeek izango dituzten onurak.
Hasteko, orain arte blokeatuta egon diren 12 milioi euro udalei ematea onartu du Foru Aldundiak. Horren ondorioz, ohiko finantzazioaren bidez diru gehiago jasoko dute eskualdeko udalek.
Nahiz eta oraindik kopuruak ez diren zehaztu Gonzalezek aurreratu du hurrengo hiru urteetan, Laudio 800.000 euro, Amurrio 400.000 euro, Aiara 65.000 euro, Artziniega 60.000 euro eta Okondok 35.000 euro inguru jasoko dituztela.
Aiarako Koadrila eta Batzar Administratiboak
Udalak ez ezik, gainontzeko erakundeak ere aipatu ditu Ramiro Gonzálezek, Aiarako Koadrila eta batzar administratiboak, alegia. Horrela, Aiarako Koadrilak 54.000 euro gehiago jasoko ditu eta euskara teknikaria mantenduko du. 2012an alderdi popularrak kentzeko asmoa zuela adierazi zuen.
Bestalde, 300.000 euro bideratuko ditu Aldundiak lana sustatzeko programak ordaintzeko. Diru kopuru hori 6 koadrilen artean banatuko da.
Batzar administratiboen kasuan zein gainontzeko tokiko erakundeen harira, EAJk ziurtatu du “Arrazionalizazio eta jasangarritasunaren legearen” aurrean orain arte izan dituzten eskumen guztiak mantentzearen alde egingo duela eta gogoratu du PPk erakunde horien eskumenak urratzeko asmoa iragarri duela behin baino gehiagotan.
Apostu garrantzitsua
Arabako egoera ekonomikoa larria denez -langabezia %17,2koa da Aiaraldeko herri arabarretan-, oso garrantzitsutzat jo du Ramiro Gonzálezek aurrekontuak berriro ez luzatzea, langabezia jaisteko eta joera ekonomikoa aldatzeko funtsezko tresna baita. Horregatik, nahiz eta ideologikoki ezberdintasun handia egon, akordio batera heldu dira PPrekin.