Abenduaren 6a Espainiar Konstituzioaren eguna da, herritar askorentzat jaiegun arrotza. Hau aldarrikatzeko, hainbat ekintza antolatu dira eskualdean.
Alde batetik, Laudioko Udalak egutegi alternatiboa indarrean du eta hori dela eta langile askok abenduaren 6a laneguna izango dute, eta aldiz abenduaren 3a, euskararen eguna, jaiegun. Beraz, Udala aste osoan zehar irekita egongo da eta ostiralean zerbitzu guztiak eskainiko dizkie herritarrei.
Honetaz gain, Laudio Ikastolan egutegi propioaren aldeko ekimena antolatu dute, Ikasle Abertzaleak, LABeko enpresa batzordeak eta guraso talde batek antolatuta. Goizeko 10etan harrera eta manifestuaren irakurketa izango da, 10,30etan hausnarketa eta egutegi propioaren garapenerako ekimenak eta 11etan hitzaldia. Gaia "LOMCEren aurkako erantzuna Euskal Herritik" izango da eta hizlaria berriz, Miren Larrion, Gure Hezkuntza plataformako kidea eta EHUko irakaslea. Haurtzaindegi zerbitzua ere egongo da.
Orozkoko Gaztetxeak ere ekintzak antolatu ditu "jai arrotzei uko eginez independentzia!" lelopean. 19,30etan Gazta Zati Bat dokumentalaren emanaldia izango da, 21,30etan afaria (tiketak gaztetxean bertan daude salgai 7/10eurotan) eta ondoren kontzertua Bieskas taldearekin.